B d t kishilik hoquq mutexessisliri: xitay hökümiti b d t doklat qilghan kishilik hoquq mesilisini hel qilishi kérek

Birleshken döletler teshkilati kishilik hoquq alahide ishxanisi 9-ayning 7-küni axbarat élan qilip, b d t kishilik hoquq mutexessislirining Uyghur rayonidiki kishilik hoquq mesilisige jiddiy qarash kérekliki heqqidiki ortaq bayanatini jakarlighan.

B d t ning musteqil kishilik hoquq mutexessisliri bu bayanatida xitay hökümitining b d t élan qilghan bu doklattiki kishilik hoquq mesilisini hel qilishi, dunyaningmu bu mesilige köz yummasliqi kéreklikini bildürgen. Ular mundaq dégen: “Xelq'ara jem'iyet Uyghur aptonom rayonida yüz bériwatqan sistémiliq kishilik hoquq depsendichilikige sel qarimasliqi we buning az sanliq millet puqralirigha körsitiwatqan tesirige diqqet qilishi kérek”.

Mutexessisler 8-ayning 31-küni élan qilin'ghan bu doklatning etrapliq we prinsipliq bolghanliqini, chünki uningda b d t kishilik hoquq alahide programmisida xizmet qilghan mes'ul xadimlar we xizmet guruppisining tekshürüsh doklati we köz qarashlirining asas qilin'ghanliqini bildürgen. Ular yene mezkur doklatta xitayning “Térrorluq we esebiylikke qarshi turush qanun-siyasiti” ni süy'istémal qilish usullirigha diqqet qilishni tewsiye qilghan.

Mutexessisler yene b d t kishilik hoquq aliy kéngishini xitaydiki kishilik hoquq mesilisi toghruluq alahide yighin échishqa, yighinda kishiler köngül bölüwatqan xalighanche tutqun qilish, mejburiy ghayib qiliwétish, diniy erkinlik we söz erkinlikini cheklesh qatarliq mesililerni muhakime qilishqa chaqirghan. Mutexessislerning pikriche, b d t kishilik hoquq aliy kéngishi bir mutexessisler guruppisi qurup, xitaydiki kishilik hoquq ehwalini her yili dégüdek nazaret qilip doklat bérip turushni oylishishi kérek. B d t yene alahide elchi teyinlep, b d t gha eza döletler, b d t organliri we chong karxanilargha heydekchilik qilish arqiliq xitayning kishilik hoquq mes'uliyitini ada qilishigha türtke bolushni oyliship baqsa bolidu.