Xitayda ziyarette bolghan b d t ning re'isi Uyghurlar mesilisini tilgha almighan

1-Féwraldin bashlap xitayda 4 künlük ziyarette bolghan b d t omumiy qurultiyining re'isi chaba korosi, xitay da'iriliri bilen bolghan söhbette Uyghurlar mesilisini tilgha élip qoymighan. Anatoliye agéntliqining xewer qilishiche, chaba korosining bayanatchisi pa'ulina kubiyak muxbirlargha qilghan sözide, “Shinjangdiki Uyghur we bashqa musulman milletlerning kishilik hoquqining depsende qilinishi, korosining xitay da'iriliri bilen bolghan muzakirilerde küntertipke kelmigenliki” ni éytqan. Chaba korosining 1-féwral bashlan'ghan 4 künlük ziyaritining asasliq küntertipi xitayning yuqiri derijilik xitay emeldarliri bilen tetqiqatchiliri bilen uchurushup, izchil tereqqiyat we su we insha'at qurulushlirini muzakire qilish bolghan.

Anatoliye agéntliqining éytishiche, korosining bayanatchisi pa'ulina kubiyak 2-féwral muxbirlargha qilghan sözide, korosining “Bügün béyjingda wang yi bilen körüshkenliki” we “Xitayning b d t diki rehberlik roli, uning xelqlerni we yersharini qollash tirishchanliqigha rehmet” éytqanliqini bildürgen. U yene söhbette xewpsizlik kéngishining islahati, ukra'ina urushi, uning yershari iqtisadigha bolghan tesiri qatarliq mesililerningmu muzakire qilin'ghanliqini éytqan. Lékin pa'ulina kubiyak anatoliye agéntliqi muxbirining söhbette korosining néme üchün kishilik hoquq depsendichilikini otturigha qoymighanliqi heqqidiki bir so'aligha: “Kishilik hoquq mesilisi muzakire qilinmidi, chünki bu uning küntertipidiki mesile emes” dep jawab bergen. Uning körsitishiche, xitay sepiri resmiy ziyaret bolup, bu su mesilidiki izchil tereqqiyatni meqset qilghan” iken.

Lékin chaba korosi b d t kishilik hoquq aliy komissari ishxanisining ötken yili élan qilghan doklatida, xitayning Uyghurlargha qarita “Insaniyetke qarshi jinayet sadir qilghan bolushi mümkinliki” ni éytqan bolsimu, uninggha köz yumush bilen eyiblinip kéliwatqan birdin-bir emeldar emes. B d t bash katipi antoni'o gotérrésmu buninggha süküt qilish bilen eyiblinip kelgen.