Б д т кишилик һоқуқ кеңиши әзалири музакирисидә хитай мәҗбурий әмгәк мәсилисини инкар қилишқа урунған

Мухбиримиз җәвлан
2022.10.05
Share on WhatsApp
Share on WhatsApp

Б д т кишилик һоқуқ кеңишигә әза 47 дөләт уйғур районидики кишилик һоқуқ мәсилиси тоғрулуқ бирәр қарар елиш музакириси қиливатқан күнләрдә хитай вәкиллири бир “уйғур шаһит” ни сөзлитип, мәҗбурий әмгәк мәсилисини инкар қилишқа урунған.

Мушу бир-икки күндә, б д т ниң кишилик һоқуқ қарари чиқириш оргини болған кишилик һоқуқ кеңиши 2023-йил 2-айда ечилидиған йиғинда уйғур районидики кишилик һоқуқ әһвали һәққидә муназирә елип бериш тәклипигә қарап чиқмақчи болған. Хитай болса бу кеңәшкә әза 47 дөләт ичидин өзигә чөпқәт издәп, бу муназириниң оттуриға чиқишини тосуп қалмақчи болған.

Б д т кишилик һоқуқ кеңишини контрол қилишқа урунуватқан хитай, бу кеңәшкә әза дөләтләргә хата учур беришни давамлаштуруп кәлгән; 10-айниң 4-күни өткүзүлгән йиғинда аминә обул исимлик бир шаһитни оттуриға чиқирип сөзлитип, мәҗбурий әмгәк мәсилисини инкар қилған.

Аминә обул өзиниң 5 йил бурун фукаң енергийә чәклик ширкитигә келип ишлигәнликини, айлиқ маашиниң 5000 йүәндин ашидиғанлиқини, “америка вә ғәрб дуняси тапқан мәҗбурий әмгәк мәсилисиниң мәвҗут әмәслики” ни сөзлигән.

Хитай таратқулири тәшвиқ қиливатқан “шинҗаң һекайиси” дики бир учурға қариғанда, һазир үрүмчидикиләрниң мааши ғәрби шимал райони бойичә биринчи орунда, хитай бойичә 25-орунда туридикән. Һалбуки уйғур районида хитайларниң нәччә һәссә көп мааш алидиғанлиқи, шундақла хитайдики пул пахаллиқиға нисбәтән ейтқанда, 5000 йүән маашниңму төвән икәнлики мәлум.

Лекин, хитай мәтбуатлири йәнә өзлириниң илгирики мәлуматлирида завутларда ишләйдиған уйғур әмгәк күчлириниң 3 миң йүән әтрапида маш алидиғанлиқиниму махтинип тәшвиқ қилғаниди. Лекин бу қетим мәзкур уйғур аялни бирақла 5 миң йүән алидиған қилип сөзләткән.

Хитай һөкүмити алдинқи қетим ачқан ахбарат елан қилиш йиғинидиму 5 “уйғур шаһит” ни сөзлитип, өзини ақлиғаниди. Канададики паалийәтчи мәмәт тохти әпәнди бу һәқтә радийомизға қилған сөзидә, хитайниң бу оюнлириға хитайни билидиған дөләтләрниң алданмайдиғанлиқини оттуриға қойғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.