Б д т ға әза 50 дөләт кишилик һоқуқ алий комиссариниң “шинҗаң доклат” ни қоллап баянат елан қилди

Мухбиримиз әркин
2022.10.31
Share on WhatsApp
Share on WhatsApp
Б д т ға әза 50 дөләт кишилик һоқуқ алий комиссариниң “шинҗаң доклат” ни қоллап баянат елан қилди Б д т ға әза 50 дөләт сабиқ б д т кишилик һоқуқ алий комиссари бачелетниң бу йил 31-авғуст елан қилған уйғурлар һәққидики доклатини қоллайдиғанлиқини билдүргән. 2022-Йили 31-өктәбир.
UN Photo / Jean-Marc Ferre

31-Өктәбир күни б д т ға әза 50 дөләт б д т омумий кеңишиниң 77-қетимлиқ йиғинида ортақ баянат елан қилип, сабиқ б д т кишилик һоқуқ алий комиссари бачелетниң бу йил 31-авғуст елан қилған уйғурлар һәққидики доклатини қоллайдиғанлиқини билдүргән. Бу 16-өктәбир америка, канада, әнгилийә қатарлиқ дөләтләр тәрипидин оттуриға қоюлған бачелетниң доклатини музакирә қилиш тәклип лайиһәсиниң интайин аз пәрқ билән хитайни қоллайдиған дөләтләр тәрипидин рәт қилинишидин кейин, хәлқара җәмийәтниң уйғурларни қоллап елан қилған муһим һәрикитидур. Мәзкур баянат 31-өктәбир, б д т омумий кеңишиниң 3-комитетида канада вәкили тәрипидин оқуп өтүлгән.

Баянатта б д т кишилик һоқуқ алий комиссариниң доклатида шинҗаңдики уйғур вә башқа асаслиқи мусулман болған аз санлиқ милләтләрни халиғанчә вә кәмситиш характерлик тутқун қилишниң көлими “хәлқара җинайәт, болупму инсанийәткә қарши җинайәт тәшкил қилиши мумкин” дәп көрситилгәнлики, хитайниң бу доклатни музакирә қилишни рәт қилишидин әндишә қиливатқанлиқи тәкитләнгән. Баянатта мундақ дейилгән: “биз хитай һөкүмитини хәлқара кишилик һоқуқни қоғдаш мәсулийитигә әмәл қилишқа, шундақла б д т кишилик һоқуқ али комиссарияти ишианисиниң доклатидики тәвсийәләрни толуқ иҗра қилишқа чақиримиз.”

Баянатта йәнә хитайниң “шинҗаңдики әркинликидин халиғанчә мәһрум қилинған барлиқ кишиләрни қоюп бериш үчүн қәдәм бесиш, шундақла ғайиб болған аилә әзалириниң ақивити, уларниң қәйәрдә икәнликини айдиңлаштуруши, уларниң билән бихәтәр алақә қуруш һәм аилиси билән җәм болушини ‍ишқа ашуруши” тәләп қилинған.

Мәлум болушичә, мәзкур баянатқа албанийә, андорра, австралийә, белгийә, белиз, сомали, булғарийә, түркийә, кроватийә, канада, чехийә, финландийә, франсийә, исраилийә қатарлиқ дөләтләр имза қойған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.