B d t gha eza 50 dölet kishilik hoquq aliy komissarining “Shinjang doklat” ni qollap bayanat élan qildi

Muxbirimiz erkin
2022.10.31
Share on WhatsApp
Share on WhatsApp
B d t gha eza 50 dölet kishilik hoquq aliy komissarining “Shinjang doklat” ni qollap bayanat élan qildi B d t gha eza 50 dölet sabiq b d t kishilik hoquq aliy komissari bachélétning bu yil 31-awghust élan qilghan Uyghurlar heqqidiki doklatini qollaydighanliqini bildürgen. 2022-Yili 31-öktebir.
UN Photo / Jean-Marc Ferre

31-Öktebir küni b d t gha eza 50 dölet b d t omumiy kéngishining 77-qétimliq yighinida ortaq bayanat élan qilip, sabiq b d t kishilik hoquq aliy komissari bachélétning bu yil 31-awghust élan qilghan Uyghurlar heqqidiki doklatini qollaydighanliqini bildürgen. Bu 16-öktebir amérika, kanada, en'giliye qatarliq döletler teripidin otturigha qoyulghan bachélétning doklatini muzakire qilish teklip layihesining intayin az perq bilen xitayni qollaydighan döletler teripidin ret qilinishidin kéyin, xelq'ara jem'iyetning Uyghurlarni qollap élan qilghan muhim herikitidur. Mezkur bayanat 31-öktebir, b d t omumiy kéngishining 3-komitétida kanada wekili teripidin oqup ötülgen.

Bayanatta b d t kishilik hoquq aliy komissarining doklatida shinjangdiki Uyghur we bashqa asasliqi musulman bolghan az sanliq milletlerni xalighanche we kemsitish xaraktérlik tutqun qilishning kölimi “Xelq'ara jinayet, bolupmu insaniyetke qarshi jinayet teshkil qilishi mumkin” dep körsitilgenliki, xitayning bu doklatni muzakire qilishni ret qilishidin endishe qiliwatqanliqi tekitlen'gen. Bayanatta mundaq déyilgen: “Biz xitay hökümitini xelq'ara kishilik hoquqni qoghdash mes'uliyitige emel qilishqa, shundaqla b d t kishilik hoquq ali komissariyati ishi'anisining doklatidiki tewsiyelerni toluq ijra qilishqa chaqirimiz.”

Bayanatta yene xitayning “Shinjangdiki erkinlikidin xalighanche mehrum qilin'ghan barliq kishilerni qoyup bérish üchün qedem bésish, shundaqla ghayib bolghan a'ile ezalirining aqiwiti, ularning qeyerde ikenlikini aydinglashturushi, ularning bilen bixeter alaqe qurush hem a'ilisi bilen jem bolushini ‍ishqa ashurushi” telep qilin'ghan.

Melum bolushiche, mezkur bayanatqa albaniye, andorra, awstraliye, bélgiye, béliz, somali, bulghariye, türkiye, krowatiye, kanada, chéxiye, finlandiye, fransiye, isra'iliye qatarliq döletler imza qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.