Kishilik hoquq teshkilatliri b d t kishilik hoquq aliy komissarining Uyghur éli ziyariti heqqide öz endishilirini bildürgen

Muxbirimiz erkin
2022.05.02

Uyghur, tibet, xongkong, mongghol teshkilatliri we démokratik xitay wekilliri 2-may küni tor axbarat yighini ötküzüp, b d t kishilik hoquq aliy komissari mishél bachélétning 5-ay ichide Uyghur éligha qilidighan ziyaritini tenqid qilghan. Ularning éytishiche, b d t kishilik hoquq aliy komissari xitayni jawabkarliqqa tartishta yétersiz qalghan. 2-May küni dunya Uyghur qurultiyi'i, tibet herkiti inistituti, xongkong közitish teshkilati, jenubiy monggholiye kishilik hoquq merkizi we bezi xitay démokratlirining ötküzgen birleshme axbarat yighinida, bachélétning xitay ziyaritidin endishe qilidighanliqini bildürgen.

Ularning éytishiche, bachélét bu ziyarette bashqilardin pikir almighan, shundaqla ochuq-ashkara bolmighan. Axbarat yighinida herqaysiy terepler, ziyarettin burun bachélét bilen körüshüshni ümid qilidighanliqi, b d t kishilik hoquq aliy komissariyatining sherqiy türkistan toghrisida teyyarlighan doklatini élan qilishini, ziyarette tibet, sherqiy türkistan, xokngong qatarliq jaylardiki barliq orunlarni cheklimisiz tekshürüshke kapaletlik qilishni telep qilghan.

B d t kishilik hoquq aliy komissari bu yil 3-ayda xitay bilen Uyghur élini ziyaret qilish toghrisida kélishim hasil qilghanliqi, ziyaretning 5-ayda élip bérilidighanliqini élan qilghan idi, halbuki, bachélétning ishxanisi teyyarlighan Uyghurlar heqqidiki doklatni élan qilishni hazirgha qeder kéchiktürüp kelgen.

Mezkur axbarat yighini b d t ning mezkur doklatini aldi bilen xitaygha béridighanliqi heqqidiki xewerlerdin kéyin ötküzülgen. AmérikadikiCNS  Xewerliri torining ötken hepte xewer qilishiche, b d t kishilik hoquq aliy komissari ishxanisining bayanatchisi liz trussél, doklatning aldi bilen xitaygha körsitilidighanliqini éytqan. Eger bachélétning xitay ziyariti ongushliq bolsa, bu b d t kishilik hoquq aliy komissarining 16 yildin kéyin tunji qétim xitayni ziyaret qilishigha ruxset qilinishi bolup qalidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.