Bénédékt rogérs: “Kishilik hoquq aliy komissari özining rohini xitayning rehimsiz réjimigha sétiwetti”

Muxbirimiz irade
2022.06.23
Share on WhatsApp
Share on WhatsApp

En'gliyediki kishilik hoquq pa'aliyetchisi we yazghuchi bénédékt rogérs (Benedict Rogers) yéqinda “Asiya katolik birliki” xewer torbétide (UCA NEWS) kishilik hoquq aliy komissari mishel bachélétning Uyghur élidiki ehmiyetsiz ziyariti heqqide bir parche maqale élan qildi. U maqalisige “B d t ning kishilik hoquq aliy komissari özining rohini xitayning rehimsiz réjimigha sétiwetti” dep mawzu qoyghan.

U maqalisini mishel bachélétning kélip chiqish tarixi bilen baghlap chüshendürgen. U méshel bachélétning chilining herbiy diktatori awgusto pinochétning ziyankeshlikige uchrap, türmide qiynap öltürülgen öktichining qizi bolushi, özining we apisiningmu qoshup tutulup türmide qiyin-qistaqqa élin'ghanliqi, töt yil sürgün hayatini bashtin kechürgen biri bolush süpiti bilen eslide diktatorlargha qarshi heqiqetni sözleshni eng yaxshi bilidighan biri bolushi kéreklikini bayan qilghan.

U maqaliside yene, chilining prézidénti bolup saylan'ghandin kéyin pinochétning 16 yérim yilliq mustebit hakimiyitining dehshetlirini chili xelqning untup qalmasliqi üchün bir kishilik hoquq muzéyi achqan, 2009-yili 11-ayda chilining kishilik hoquqini ilgiri sürüsh we qoghdash üchün tunji döletlik kishilik hoquq tetqiqat orni qurghan mishel bachélétning xitaygha kelgende pütün bu heriketlirini untup qalghanliqini bayan qilghan. Bénédékt rogérs, mishel bachélétning xitayning Uyghurlargha qiliwatqan zulumi tekshürülgen doklatini élan qilmayla qalmay, u yerge barghandin kéyinmu xitay kompartiyesining teshwiqatchisidek ularning Uyghur qirghinchiliqini perdazlap qilghan geplirini eynen tekrarlighanliqi, qisqisi mustebit xitay hakimiyitige rohini sétip, uning xoshametchilikini qilip qaytip kelgenlikini bayan qilghan.

Bénédékt rogérs maqaliside mishel bachélétni eyni chaghda lénin özining bir sözide teswirligendek, xitay kompartiyesi üchün “Paydiliq exmeq” qe aylandi, dep yazghan.

U yene maqalisi axirida b d t kishilik hoquq aliy komissari mishel bachélit we b d t bash sékrétari antoniyo gutérs her ikkilisining b d t ning qurulush meqsitige xilap halda, adaletni yaqilashtin bash tartip kelgenlikini, ularning b d t 'ning obrazigha qattiq dagh chüshürgenlikini tilgha élip, yéngi nöwetlik b d t rehberlirining “Béyjingdiki paydini emes, eksiche b d t ning qimmet qarishini gewdilendüridighan, uninggha ishinidighan we uni qoghdaydighan rehberler” bolushini arzu qilidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet