Émma réyliy b d t kishilik hoquq aliy kéngishining xitay bilen bolghan ichkiy munasiwitini pash qilghan

Muxbirimiz irade
2021.08.26
Share on WhatsApp
Share on WhatsApp

Dunyaning herqaysi jayliridiki chiriklikke qarshi turush organlirigha wekillik qilidighan bir guruppa, birleshken döletler teshkilatining bash katipini b d t ning kishilik hoquq adwokati émma réylini qoghdashqa chaqirdi.

B d t ning xadimliridin émma rélliy, b d t qarmiqidiki kishilik hoquq aliy kéngishi (OHCHR) ning 2013-yilidin buyan b d t yighinigha qatnishidighan Uyghur we tibet wekillirining isimlikini xitay hökümitige yollap bériwatqanliqini pash qilghan idi.

Yuqiriqi guruppining ilgiri sürüshiche, b d t özining bu qilmishini ashkarilap qoyghan émma rélliyni xizmettin qoghlash koyigha chüshken. Ular b d t bash katipigha yazghan xétide mundaq dégen: “Birleshken döletler teshkilati dunya miqyasida kishilik hoquqni qoghdighuchi bolushigha qarimay, kishilik hoquq aktiplirini qoghdiyalmighanliqi üchün bu mes'uliyetni üstige élishi kérek. Biz émma réyliy xanimning dégenliri üstide toluq, ishenchlik we musteqil tekshürüsh élip bérilishini telep qilimiz.”

“Pash qilghuchilarni qoghdash xelq'ara tori” namliq organ b d t bash katipi antoniyo gutérrésqa yazghan xétide émma réyligha qarshi élip bérilghan her qandaq heriketni derhal toxtitishqa chaqirghan.

Bu organning ijra'iye diréktori anna mérs “Fokis xewerliri” ge qilghan sözide “Birleshken döletler teshkilatining hazirqi ichkiy edliye sistémisi xataliqlarni pash qilghan b d t xizmetchilirini qoghdimaywatidu. Bu nomus qilarliq bir ehwal, u choqum özgirishi kérek,” dégen.

Émma réyliy amérikaning bir qisim palata ezaliri bilen bolghan söhbette b d t kishilik hoquq kéngishining her qétimliq yighin'gha qatnishidighanlarning tizimlikini aldin xitaygha bérip kéliwatqanliqini éytqan hemde buni “B d t ning xitaygha xushamet qilishi” dep körsetken. U bu mesilini köp qétim b d t ning munasiwetlik orunlirigha melum qilghan, shundaqla bu heqte amérika hökümitige bir parche shikayet xéti yazghan bolup, uningda kishilik hoquq aliy kéngishining xitay hökümiti “Düshmen” dep qaraydighan kishilerning b d t yighinigha qatnishish ehwali, waqti qatarliq uchurlarni yighindin burun xitay hökümitige yollap bérip kelgenlikini éytqan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.