Хитай б д т кишилик һоқуқ кеңишиниң әзалиқиға йәнә сайланди

Мухбиримиз әркин
2016-10-28
Елхәт
Пикир
Share
Принт

Б д т җүмә күни биләт ташлап, б д т кишилик һоқуқ кеңишиниң йеңи әзалирини сайлап чиқти. Сайламда хитай кишилик һоқуқ кеңишиниң әзалиқиға йәнә сайланған. Сайламдин бурун бәзи тәшкилатлар хитайниң кишилик һоқуққа, уйғур вә тибәтләрниң һәқ-һоқуқлириға хилаплиқ қиливатқанлиқини илгири сүрүп, уни кишилик һоқуқ кеңишиниң әзалиқидин қалдуруп қоюшқа һәрикәт қилған.

«Җуңго пуқралар күчи» намлиқ хитай өктичи тәшкилатиниң рәиси яң җйәнли «вашингтон почта гезити» дә мақалә елан қилип, демократик дөләтләрни хитайниң әзалиқиға қарши аваз беришкә үндигән.

У мақалисидә, «хитай кишилик һоқуқ кеңишигә әза болуп турған мәзгилдә хитайда кишилик һоқуққа хилап миңлиған, онмиңлиған дело йүз бәрди. Буниң мисали, тинчлиқпәрвәр мөтидил уйғур зиялийси илһам тохти 2014‏-йили қолға елинип, муддәтсиз қамақ җазасиға һөкүм қилинди» дегән иди.

Җүмә күнки сайламда хитай әзалиққа сайланған болсиму, әмма русийә сайлиналмиди. Русийә йеқиндин буян сүрийәдә бигунаһ авам хәлқни бомбардиман қилип, уруш җинайити садир қилиш билән әйиблинип кәлгән.

Кишилик һоқуқ көзитиш тәшкилатиниң б д т да турушлуқ вәкили луис чарбоний, б д т ға әза дөләтләр русийәниң әзалиқини рәт қилип, кримилинға күчлүк сигнал бәргәнликини тәкитигән. Җүмә күнки сайламда хитай, ирақ, сәуди әрәбистан, мисир, биразилийә, риванда, венгирийә, куба, җәнубий африқа, тунис, америка, әнглийә, японийә қатарлиқ дөләтләр әзалиққа сайланди.

Пикирләр (0)
Share
Толуқ бәт