B d t özining xitayni Uyghur qatarliq pa'aliyetchilerning ismi bilen teminligenlikini ashkarilighan xadimini xizmitidin boshatqan

Muxbirimiz erkin
2021-11-15
Share

B d t, bu organning xitayni Uyghur qatarliq pa'aliyetchilerning ismi bilen teminligenlikini ashkarilighan b d t xadimi éma rayléyni xizmitidin boshatqan. Éma rayléyning 13-noyabir en'gliyelik zhurnalist mejid nawazning ziyaritini qobul qilghanda éytishiche, b d t ötken hepte éma rayléyning herikitidin "Pushayman qilmighanliqi" ni "Éghirlashturghuchi amil" dep qarap, b d t diki xizmitidin boshatqan. "Heptilik xewerler" zhurnilining ashkarilishiche, éma rayléy b d t ning xitay hökümitini Uyghur pa'aliyetchilirining ismi bilen ‍aktip teminlep kelgenlikini éytqan.

Éma rayléy ilgiri b d t kishilik hoquq kéngishining her qétimliq yighinidin burun xitayning yighin'gha qatnishidighan Uyghur we bashqa xitay öktichilirining tizimlikini soraydighanliqi, bu b d t qa'idisige xilap bolsimu, biraq uning xitayni bu uchur bilen teminleydighanliqini ashkarilighan. U bu ehwalni 2013-yilidin bashlap bayqashqa bashlighan bolup, u b d t ning xitaygha bergen tizimliki ichide d u q re'isi dolqun eysaningmu barliqini bildürgen. Éma rayléyning bayani firansiyening "Lémondé" qatarliq gézitlerliride élan qilinip qozghula qozghighan.

B d t kishilik hoquq kéngishi xitayni bundaq tizimlik bilen teminligenikini ret qilmighan. Biraq 2015-yildin kéyin xitayni tizimlik bilen teminlep baqmighanliqini ilgiri sürgen idi. Éma rayléyning 13-noyabir mejid nawazning ziyaritini qobul qilghanda, b d t ning uni "Yalghan sözlesh" bilen emes, b d t ning "Abruyigha selbiy tesir körsetti" dep eyibligenlikini bildürgen. Uning éytishiche, , b d t bash katipi gutérés xitayning kilimat mesilisidiki hemkarliqini dep kishilik hoquq kéngishining herikitige köz yumghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet