Әнглийәдә бейҗиң олимпик мусабиқисини байқут қилиш чақириқлири күчәйди

Мухбиримиз әзиз
2021-07-07
Share

Хитай һөкүмитиниң уйғурларға қарита ирқий қирғинчилиқ йүргүзиватқанлиқи көпләп мәлум болуватқанда, әнглийә сиясий саһәсидә 2022-йилидики бейҗиң қишлиқ олимпик мусабиқисини байқут қилиш чақириқлири көпләп ‍оттуриға чиқишқа башлиди.

Әнглийә ташқий ишлар вәзирлики вәзиписиниң риқабәтчиси болуватқан парламент әзаси лиса нәндий ханим 7-июл күни әнглийәдики әң чоң телевизийә қаналлириниң бири болған "асман" телевизийәсиниң нәқ мәйдан зияритидә уйғурлар мәсилисини алаһидә тилға алди. У: "инсанийәткә қарши җинайәт садир қиливатқан һәмдә ирқий қирғинчилиқни давам қилдуриватқан хитайдәк бир дөләттики олимпик мусабиқини һөкүмитимиз қәтий байқут қилиши һәмдә тәнһәркәтчиләрни мусабиқигә әвәтмәслики лазим" деди.

У зиярәт сөһбитидә нөвәттә бир милйондин артуқ уйғурниң лагерларға қамилип болғанлиқидәк ашкара пакит мәвҗут болуватқанда, артуқ сөзниң һаҗәтсиз икәнликини билдүрди. Хәвәрдә ейтилишичә, нөвәттә бу хилдики чақириқлар әнглийә ташқий ишлар вәзири доминик раб вә мәдәнийәт вәзири оливер довдинға көпләп йолланмақта икән.

"асман" хәвәрлириниң бу һәқтики хәвиригә яндаштуруп берилгән "мәдәнийәт қирғинчилиқи" һәққидики программисидиму мәзкур телевизийә қанили әвәткән мухбирлар гурупписиниң хотәндики тәкшүрүш нәтиҗиси тонуштурулған. Филимдә мухбирлар гурупписи хотән шәһридики қәбристанлиқларниң пүтүнләй көчүрүветилгәнликини, униң орнини олтурақ бина қурулуши вә машина тохтитиш мәйдани игилигәнликини көргән. Шуниңдәк хитай һөкүмитиниң "пуқраларниң диний етиқад әркинликигә пүтүнләй вә толуқ һөрмәт қилиниду" дегән сөзләрниң қип-қизил ялғанчилиқ икәнликини нәқ мәйданда испатлиған.

Хәвәрдә ейтилишичә, әнглийә ташқий ишлар вазарити һазирчә бейҗиң олимпик мусабиқисини байқут қилиш һәққидә техи ахирқи қарарни алмиған. Мәзкур вазарәт 2021-йили март ейида уйғур дияридики төт нәпәр хитай әмәлдариға "кишилик һоқуқ дәпсәндичилики үчүн җавабкар болуши лазим" дәп имбарго елан қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт