En'gliyede béyjing olimpik musabiqisini bayqut qilish chaqiriqliri kücheydi

Muxbirimiz eziz
2021-07-07
Share

Xitay hökümitining Uyghurlargha qarita irqiy qirghinchiliq yürgüziwatqanliqi köplep melum boluwatqanda, en'gliye siyasiy saheside 2022-yilidiki béyjing qishliq olimpik musabiqisini bayqut qilish chaqiriqliri köplep ‍otturigha chiqishqa bashlidi.

En'gliye tashqiy ishlar wezirliki wezipisining riqabetchisi boluwatqan parlamént ezasi lisa nendiy xanim 7-iyul küni en'gliyediki eng chong téléwiziye qanallirining biri bolghan "Asman" téléwiziyesining neq meydan ziyaritide Uyghurlar mesilisini alahide tilgha aldi. U: "Insaniyetke qarshi jinayet sadir qiliwatqan hemde irqiy qirghinchiliqni dawam qilduriwatqan xitaydek bir dölettiki olimpik musabiqini hökümitimiz qet'iy bayqut qilishi hemde tenherketchilerni musabiqige ewetmesliki lazim" dédi.

U ziyaret söhbitide nöwette bir milyondin artuq Uyghurning lagérlargha qamilip bolghanliqidek ashkara pakit mewjut boluwatqanda, artuq sözning hajetsiz ikenlikini bildürdi. Xewerde éytilishiche, nöwette bu xildiki chaqiriqlar en'gliye tashqiy ishlar weziri dominik rab we medeniyet weziri oliwér dowdin'gha köplep yollanmaqta iken.

"Asman" xewerlirining bu heqtiki xewirige yandashturup bérilgen "Medeniyet qirghinchiliqi" heqqidiki programmisidimu mezkur téléwiziye qanili ewetken muxbirlar guruppisining xotendiki tekshürüsh netijisi tonushturulghan. Filimde muxbirlar guruppisi xoten shehridiki qebristanliqlarning pütünley köchürüwétilgenlikini, uning ornini olturaq bina qurulushi we mashina toxtitish meydani igiligenlikini körgen. Shuningdek xitay hökümitining "Puqralarning diniy étiqad erkinlikige pütünley we toluq hörmet qilinidu" dégen sözlerning qip-qizil yalghanchiliq ikenlikini neq meydanda ispatlighan.

Xewerde éytilishiche, en'gliye tashqiy ishlar wazariti hazirche béyjing olimpik musabiqisini bayqut qilish heqqide téxi axirqi qararni almighan. Mezkur wazaret 2021-yili mart éyida Uyghur diyaridiki töt neper xitay emeldarigha "Kishilik hoquq depsendichiliki üchün jawabkar bolushi lazim" dep imbargo élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet