Amérika dölet mejlisining ezaliri béyjing qishliq olimpik musabiqisini kéchiktürüshni telep qilghan

Amérika dölet mejlisining nopuzluq ikki ezasi 23-iyul xelq'ara olimpik komitétining prézidénti tomas baxqa xet yézip, 2022-yilliq béyjing qishlik olimpik musabiqisini kéchiktürüshni, eger xitay qorqunchluq kishilik hoquq depsendichilikini toxtatmisa, olimpikni bashqa döletke yötkeshni telep qilghan.

Bu xetni amérika dölet mejlisi xitay ishliri komitétining qosh re'isliridin kéngesh palata ezasi jéf mérkléy bilen awam palata ezasi jéymis mikgowérin yazghan. Ular xétide “Héchqandaq olimpik irqiy qirghinchiliq we ‍insaniyetke qarshi jinayet sadir qiliwatqan bir dölette ‍ötküzülmesliki” ni bildürgen.

Xette, bu komitétning sabiq re'isliridin awam palata ezasi kristofér simis we kéngesh palata ezasi marku rubiyolarning 2018-yili uninggha xet yazghanliqi, lékin uning jawab qayturmighanliqi, 2018-yilidin kéyin Uyghur we bashqa musulman milletlerning weziyiti téximu éghirlashqanliqi bildürülgen.

Xette yene amérika tashqi ishlar ministirliqi xitay hökümitining herikitini “Irqiy qirghinchiliq”, “‍Insaniyetke qarshi jinayet” dep békitkenlikini tekitlep, “Biraq biz xelq'ara olimpik komitétining xitay hökümitining qilmishini özgertishke bésim ishlitish üchün heriket qilghanliqigha a'it héchqandaq pakit körmiduq” déyilgen.

Ularning tekitlishiche, “Eger xelq'ara olimpik komitéti irqiy qirghinchiliq we insaniyetke qarshi jinayet sadir qiliwatqan dölette héchqandaq ish bolmighandek olimpik musabiqisi ötküzüshni dawamlashtursa, buning olimpik herikiti we xelq'ara jem'iyetke bolghan tesiri intayin nachar bolidiken”.