D u q: "Béyjing olimpik musabiqisi xitayning qirghinchiliq xorikini téximu östüriwétidu!"

Muxbirimiz eziz
2021-08-31
Share

2022-Yili béyjingda ötküzülmekchi boluwatqan béyjing qishliq olimpik musabiqisi izchil herqaysi sahening bayqut qilish chuqanlirigha duch kéliwatqan bolup, yéqinda dunya Uyghur qurultiyi bu heqtiki meydanini yene bir qétim ashkara ipade qildi.

Amérikadiki oqurmenliri eng köp bolghan xewer agéntliqliridin "Bréybart xewerliri" (Breitbart News) yéqinda mexsus d u q bilen söhbetliship, bu heqtiki tehrirat maqalisini élan qildi. Bu qétimqi söhbette d u q ning yawropa siyasitige da'ir ishlargha mes'ul diréktori ku'én stup ehwal tonushturup: "Xitayning olimpik musabiqisi ötküzüshige yol qoyush emeliyette xitay hökümitige 'sen xalighan ishliringni qiliwer' dégenlikke barawer. Eger bu musabiqe béyjingda ötküzülse éniqki, xitay hökümitining Uyghurlargha yürgüziwatqan jinayetlik qilmishlirini téximu yuquri pellige chiqirish xoriki yene bir baldaq ösidu" dégen.

Bu qétimqi söhbette ku'én stup nöwette Uyghurlar duch kéliwatqan irqiy qirghinchiliq, mejburiy emgek we bashqa munasiwetlik mesililer otturigha qoyulup, béyjing qishliq olimpik musabiqisini qandaqtur "Qismen bayqut qilish" yaki "Diplomatik bayqut qilish" sheklide emes, belki "Toluq bayqut qilish" lazimliqini, undaq qilmay bu qétimqi olimpik musabiqi'isige wekil ewetken döletlerning mahiyette xitay qiliwatqan zulumlargha shérik bolushni tallighanlar bolup qalidighanliqini bildürgen.

Maqalida körsitilishiche, d u q hazirgha qeder xelq'ara olimpik komitéti, shundaqla béyjing qishliq olimpik musabiqisini iqtisadiy jehettin qollighuchi xelq'araliq shirketler qatarliqlar bilen jiddiy alaqilishiwatqan bolup bu qétimqi musabiqini béyjing shehride ötküzmeslik, "Qirghinchiliq musabiqisi" dep nam élip bolghan bundaq bir musabiqining iqtisadiy ishlirigha shérik bolmasliqni tekitlep kelmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet