Xelq'ara olimpik komitéti mu'awin prézidénti jon kotésning "Xitay kishilik hoquqning sirtida" dégen sözi tenqidke uchridi

Muxbirimiz erkin
2021-10-15
Share

Xelq'ara olimpik komitétining mu'awin prézidénti jon kotésning 13-‍öktebir küni muxbirlargha qilghan sözi, twéttir qatarliq ijtima'iy alaqe supilirida ghulghula qozghap, kishilik hoquq pa'aliyetchilirining qattiq tenqidige uchrighan. Jon kotés xitayning kéler yili 2-ayda béyjing qishliq olimpik musabiqisige sahibxaniliq qilish aldida uning Uyghurlargha tutqan mu'amilisini tenqid qilishni ret qilghanidi. "El-jezire" qanilining xewiride éytilishiche, jon kotés amérika dölet mejlisi ezaliri we kishilik hoquq teshkilatlirining béyjing qishliq olimpikini kéchiktürüsh yaki bashqa döletke yötkesh chaqiriqini ret qilghan.

U, xitay "Kishilik hoquq katégoriyesining ichide emes" dégen bésharetni bergen. Shu küni awstraliye kishiliq hoquq teshkilatining diréktori éliyén péyrson twéttirda jon kotésning sözige inkas qayturup, "Jon kotés néme üchün insanliqqa qarshi jinayet sadir qiliwatqan bir hökümetni tenterbiye arqiliq yumaqchi bolidu" dep so'al qoyghan. ‍Uning éytishiche, xelq'ara olimpik komitéti kishilik hoquq istiratégiyesi élan qilghan bolsimu, biraq qishliq olimpikqa xitay sahibxaniliq qilghachqa uni tedbiqlimaydighandek körünmektiken.

Shu küni yene en'gliye nyukesél uniwérsitétining tetqiqatchisi, Uyghurshunas jo'an simis fénléymu twéttérda inkas bildürüp, "Xitayning herqandaq xelq'ara qanun we ehdinamilerge ochuq-ashkara xilapliq qilishigha qarimay, shinjangdiki wehshiylikni körmeske sélip turup, xelq'ara olimpik komitétining özini xelq'araliq durus organ, dep süretlishini chüshenmek qiyin" dep körsetken. Jon kotés 13-öktebir awstraliyediki bir qétimliq pa'aliyette, "Biz dunya hökümiti emes. Biz musabiqige sahibi'anliq qilidighan döletning igilik hoquqigha hökümet qilishi kérek" dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet