Amérikada we kanadada béyjing olimpik musabiqisini boyqut qilish chaqiriqliri kücheydi

Amérika we kanadada 2022-yilliq béyjing qishliq olimpikini boyqut qilish chaqiriqi kücheymekte. Amérika dölet mejlis ezasi jon katko 22-féwral küni amérika prézidénti jow baydén'gha resmiy mektub yollap, uningdin ochuq-ashkara irqiy qirghinchiliq bilen shughulliniwatqan bir hakimiyetning sahibxanliqidiki olimpik musabiqisini boyqut qilishqa chaqirghan.

U mektubida mundaq dégen: “Amérika ornidin des turup, amérikaning qurulush prinsipliri bolghan kishilik hoquq we qanun bilen idare qilish wedisini qoghdishi kérek. Amérika derhal heriket qollinip, xitay kompartiyesining Uyghurlarni sistémiliq yoqitishqa urunushini tizginlishi kérek. Xitay kompartiyesi qollan'ghan heriket amérika we uning dunyadiki ittipaqdashlirining qimmet qarashlirigha zit. Ochuq-ashkara irqiy qirghinchiliq qiliwatqan dölette ötküzülgen olimpik tenheriket musabiqisige qatnishish bu ortaq qimmet qarishimizgha buzghunchiliq qilipla qalmay, belki u erkin we heqqaniy jem'iyet izdeydighanlargha bergen wedimizge kölengge chüshüridu.”

Dölet mejlis ezasi jon katko amérika foks téliwiziyeside söz qilghandimu “Amérikaning bu musabiqige qatnishishi dunyagha xata ségnal béridu, xitaygha we uning taktikilirigha boldi bes, deydighan waqit keldi,” dep agahlandurdi.

Bügün, yeni 25-féwral küni amérikaning b d t turushluq sabiq elchisi nikki héylimu tiwittér torida amérika hökümitige chaqiriq qildi. U uchurida: “Amérika öz xelqige irqiy qirghinchiliq qiliwatqan we dunyagha tehdit séliwatqan bir döletni shereplendürmesliki kérek. Men amérikaning 2022-yilliq qishliq olimpik tenheriket musabiqisini bayqut qilishini telep qilimen,” dep yazghan. U bu heqte foks xewerler torida mexsus maqale élan qilghan.

Bundin bashqa yene kanadadiki 180 din artuq kishilik hoquq teshkilatliri kanada hökümitini béyjing olimpik musabiqisini bayqut qilishqa chaqirghan. Bu teshkilatlar ortaq élan qilghan chaqiriqnamida ondin artuq fédératip palata ezasi, 13 parlamént ezasi we olimpik altun médaligha érishken zhan luk brasar qatarliqlarning imzasi yer alghan iken.

22-Féwral düshenbe küni kanada awam palatasi xelq'ara olimpik komitétidin 2022-yilliq béyjing qishliq olimpik musabiqisini bashqa döletke yötkeshni telep qilish toghrisidiki teklip layihesini awazgha qoyup, maqullighan idi.