Б д т кишилик һоқуқ комиссари бермани роһеңгалиқларға "етник тазилаш" елип бериш билән әйиблиди

Мухбиримиз әркин
2017-09-11
Share

Б д т кишилик һоқуқ алий комиссари зәид раад әл-һөсәйин берма (мйәнмар) һөкүмитини әйибләп, униң роһеңга мусулманлириға қарита "етник тазилаш қолланмилиридики өрнәк" ләрни иҗра қиливатқанлиқини билдүрди.

Берма армийиси 8‏-айниң ахирлиридин башлап роһеңга мусулманлирини бастурушни күчәйткәндин буян, йүз миңлиған роһеңгалиқлар бенгалға қечип барған. Б д т мусапирлар идариси өткән җүмә күни бенгалға қечип барған роһеңгаларниң 270 миңға йәткәнликини билдүргән иди. Раад әл-һөсәйин, берма армийиси елип барған рәһимсиз тазилаш һәрикитиниң хәлқара қанунларға хилап қилмиш икәнликини билдүргән һәмдә роһеңгада өлтүрүш, хорлаш вә басқунчилиқ қатарлиқ зораванлиқ һәрикәтлириниң кәң көләмдә әвҗ алғанлиқини тәкитлигән. 

У йәнә, берманиң бастуруши "хәлқни зор көләмлик көчүшкә мәҗбурлап, уларниң қайтип келиш йолини пүтүнләй тосуштәк әхлақ мизанға хилап түс алғанлиқи" ни, берманиң нәччә он йиллардин бери роһеңгаларни пуқралиқ вә сиясий һәқләрдин мәһрум қилғанлиқини билдүргән. Раад әл һүсәйин бу сөзләрни дүшәнбә күни башланған б д т кишилик һоқуқ кеңишиниң пәсиллик йиғининиң ечилиш мурасимида сөзлигән. 

Раад әл һүсәйин сөзидә йәнә, хитай кишилик һоқуқ вәзийити һәққидә тохтилип, хитайниң кишилик һоқуқ адвукатлириға тутқан муамилисидин әндишә қиливатқанлиқини, хитайниң кишилик һоқуқ тәрәққиятиниң тибәт, уйғур вә башқа аз санлиқ гуруһларниму өз ичигә елиши керәкликини тәвсийә қилған. Бирақ, бәзи хәлқара ахбарат васитилири, униң хитай кишилик хатириси һәққидики сөзи бәк юмшақ болуп қалди, дәп тәнқид қилинди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт