Бейҗиңлиқ ата-анилар намайиш қилип балилириниң мәктипини әслигә кәлтүрүп беришни тәләп қилған

Мухбиримиз ирадә
2017-06-14
Елхәт
Пикир
Share
Принт

Ройтерс агентлиқиниң хәвиридин қариғанда, чаршәнбә күни бейҗиң шәһәрлик һөкүмәт алдида йүздәк амма йәрлик даириләрниң өзлириниң балилириниң мәктипини туюқсизла йөткивәткәнликигә наразилиқ билдүрүп намайиш қилған.
Намайиш җәрянида намайишчилар билән сақчилар арисида тиркишиш кәп чиқип, 3 киши тутқун қилинған.

Хәвәрдә ейтилишичә, оқуғучи балиларниң мәктипини туюқсиз йөткәш иши бир қисим мәктәпләрдики оқуғучи сани һәддидин зиядә көпийип, оқу-оқутуш әслиһәлири йетишмигән әһвал астида шулар турушлуқ җайдики маарип органлири тәрипидин елип берилидикән. Намайишчилардин бириниң ройтерс мухбириға ейтип беришичә, улар балилирини яхши районлардики мәктәпләрдә оқутуш үчүнла бейҗиңниң чаңпиң районидики өй баһалириниң шунчә қиммәтликигә қаримай бу райондин өй сетивалған икән. Шуңа әмдиликтә даириләрниң туюқсизла балилирини мәҗбурий һалда башқа начар мәһәллиләрдики мәктәпләргә йөткиветиши уларни қаттиқ нарази қилған.

Намайишчилар шәһәрлик һөкүмәттин балилириниң мәктипини әслигә кәлтүрүп беришни тәләп қилған. Әмма намайишчиларниң алдиға чиққан бир һөкүмәт хадими бу әһвални берип чаңпиң районлуқ һөкүмәт билән сөзлишиңлар, дегән. Сақчилар болса намайишчиларға тәһдит селип, улар дәрһал тарқалмиған тәқдирдә, һәммисиниң тутқун қилинидиғанлиқини ейтқан.

Ройтерс хәвиридә бейҗиңда адәттә бундақ намайишлар көп болмисиму, йеқиндин буян муһит булғиниши, өй-мүлк мәсилилири вә шуниңдәк иҗтимаий мәсилиләр сәвәб болған намайишларниң көпийип қалғанлиқини билдүргән.

Пикирләр (0)
Share
Толуқ бәт