Béyjingliq ata-anilar namayish qilip balilirining mektipini eslige keltürüp bérishni telep qilghan

Muxbirimiz irade
2017-06-14
Share

Roytérs agéntliqining xewiridin qarighanda, charshenbe küni béyjing sheherlik hökümet aldida yüzdek amma yerlik da'irilerning özlirining balilirining mektipini tuyuqsizla yötkiwetkenlikige naraziliq bildürüp namayish qilghan.
Namayish jeryanida namayishchilar bilen saqchilar arisida tirkishish kep chiqip, 3 kishi tutqun qilin'ghan.

Xewerde éytilishiche, oqughuchi balilarning mektipini tuyuqsiz yötkesh ishi bir qisim mekteplerdiki oqughuchi sani heddidin ziyade köpiyip, oqu-oqutush esliheliri yétishmigen ehwal astida shular turushluq jaydiki ma'arip organliri teripidin élip bérilidiken. Namayishchilardin birining roytérs muxbirigha éytip bérishiche, ular balilirini yaxshi rayonlardiki mekteplerde oqutush üchünla béyjingning changping rayonidiki öy bahalirining shunche qimmetlikige qarimay bu rayondin öy sétiwalghan iken. Shunga emdilikte da'irilerning tuyuqsizla balilirini mejburiy halda bashqa nachar mehellilerdiki mekteplerge yötkiwétishi ularni qattiq narazi qilghan.

Namayishchilar sheherlik hökümettin balilirining mektipini eslige keltürüp bérishni telep qilghan. Emma namayishchilarning aldigha chiqqan bir hökümet xadimi bu ehwalni bérip changping rayonluq hökümet bilen sözlishinglar, dégen. Saqchilar bolsa namayishchilargha tehdit sélip, ular derhal tarqalmighan teqdirde, hemmisining tutqun qilinidighanliqini éytqan.

Roytérs xewiride béyjingda adette bundaq namayishlar köp bolmisimu, yéqindin buyan muhit bulghinishi, öy-mülk mesililiri we shuningdek ijtima'iy mesililer seweb bolghan namayishlarning köpiyip qalghanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet