Prézidént baydénning hawa kélimat alahide wekilining Uyghurlarni depsende qilishqa qatnashqan xitay shirkitide pay ülüshi bar iken

Muxbirimiz erkin
2021-10-18
Share

Amérika prézidénti jow baydénning hawa kélimati alahide wekili jon keriy we uning ayalining Uyghurlarni depsende qilishqa qatnashqan amérikaning "Qara tizimliki" diki xitay shirkitining asasliq sermayedari bolghan xitay meblegh fondida pay chéki barliqi melum bolghan.

Jon keriy xitay bilen bolghan kélimat söhbitide Uyghur irqiy qirghinchiliqigha sel qarash we "Uyghur mejburiy emgikining aldini qanun layihesi" ge qarshi heriket qilish bilen eyiblip kelgen. "Washin'gton erkin mayak" gézitining éytishiche, jon keriyning "Gawling xitay meblegh fondi cheklik shérkiti" de az dégende bir milyon dollarliq pay chéki bar iken.

"Gawling xitay meblegh fondi cheklik shirkiti" xitaydiki yitu téxnologiye shirkitining eng chong paychéki bolup, "Nyu-york waqti" géziti ‍ilgiri bu shirketning xitayning Uyghurlargha qarshi yuquri téxnikaliq nazaret sistémisi qurulushigha qatniship, xitay hökümiti üchün Uyghurlarni tonuydighan yuz tonush yumtali yasighanliqini ashkarilighan.

2019-Yili amérika soda ministirliqi bu shirketni "Xitayning Uyghur, qazaq we bashqa musulman guruppilargha qarita basturush, xalighanche keng kölemlik tutqun qilish, yuquri téxnikaliq nazaret qilishni yolgha qoyup, kishilik hoquqqa xilapliq qilishi we xorlishigha ishtirak qilghanliqi" seweblik qara tizimlikke kirgüzgen idi.

Amérikaning jumhuriyetchi kéngesh palata ezasi marko rubiyo ötken hepte amérikaning "Foks" téléwiziye qanilida maqale élan qilip, prézidént baydénni "Ya qul emgikidin paydigha érishken bu ademning teripide turushqa, ya uni wezipisidin élip tashlashqa" chaqirghan. Marko rubiyo: "Hazir uning néme üchün Uyghur mejburi emgikining aldini élish qanunigha qarshi aktip heriket qilghanliqi chüshinishlik boldi," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet