Baydén hökümiti xitayning ziyanliq soda adetlirige taqabil turush üchün yenimu köp tedbir qollinidighanliqini wede qilghan

Muxbirimiz irade
2021-04-01
Share

"Politiko" gézitining xewer qilishiche, 31-mart küni baydén hökümiti xitayni "Heddin ziyade polat-tömür, alyumin we quyash énérgiye taxtisi ishlep chiqirip, yer sharidiki artuqche ishlepchiqirishqa seweb boluwatqan eng chong dölet," dep tenqid qilghan we xitayning "Bu ziyanliq soda aditini hel qilish" üchün yenimu köp heriket qollinidighanliqi toghrisida wede bergen.

Yuqiriqi sözni amérika soda wekilliri ishxanisi özining tashqiy sodidiki tosalghular toghrisidiki yilliq doklatining bir qismi süpitide otturigha qoyghan bolup, doklatning xitaygha a'it qismi 30 bettin ashidiken.

Doklatta mundaq diyilgen: "Xitayning dölet rehberlikining iqtisad we sodigha tutqan pozitsiyisi uni dunyada artuqche iqtisadiy kölem peyda qiliwatqan aldinqi qatardiki jinayetchige aylandurdi. Polat-tömür, alyumin, quyash énérgiyesi qatarliq bir qanche kesiptiki éghir ehwallar buning ispati."

Soda ishxanisi doklatida yene xitay hökümitining nechche yüz milyard dollar meblegh chiqirip, xitay shirketlirini qollash we ulardin dölet ichidiki bazar ölüshi üchün aldin békitilgen nishanni emelge ashurushni telep qilish arqiliq bashqa sahelerdimu éghir derijidiki artuqche ishlepchiqirish peyda qilish yoligha qarap méngiwatqanliqini agahlandurghan. Shundaqla xitayning bundaq ziyanliq soda aditini hel qilish üchün ikki tereplik we köp tereplik tirishchanliqini dawamlashturidighanliqini bildürgen.

"Politiko" gézitining éytishiche, baydén hökümitining bu keskin pozitsiyesi amérika-xitay soda munasiwetlirining bundin kéyinmu rawan bolmaydighanliqining ipadisi iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet