Prézidént jow baydén noruz bayrimini tebriklidi

3-Ayning 20-küni, amérika prézidénti jow baydén noruz bayrimi munasiwiti bilen tebrik sözi yollap, turan we iran xelqi, omumen bu bayramni ötküzidighan barliq qewmlirige tinchliq we xushalliq tilidi.

U 20-mart küni yollighan tiwéttirida noruz tileklirini bildürüp: “Noruz bayrimi ming yillardin buyan ötküzülüp kéliwatqan bayram bolup, bügün dunyada milyonlighan insanlar bu bayramni tebrikleydu. Bu yéngi bir yilning bashlinishi, bu bayram bizge zulmetning haman arqida qalidighanliqini, ümid téngining haman aldimizda ikenlikini eskertidu. Barliq noruz ehlige shadliq tileymen” dédi.

Prézidént jow baydén yene 3-ayning 20-küni aqsarayda noruz bayrimi ötküzidighan barliq milletlerning, jümlidin amérika, yawropa, türkiye we ottura asiyadiki barliq Uyghurlarning en'enwi bayrimi bolghan noruz künini kütiwélish pa'aliyiti ötküzdi. U bu pa'aliyette qilghan tebrik sözide, yéngi yilning bashlinishi bolghan bu qutluq künning bu bayram mensuplirigha ümid béghishlishini ümid qilidighanliqini, türkiyede yer tewresh apitige uchrighan a'ililerning, insanliq hoquqi depsende qiliniwatqan kishilerning bu éghir künlerdin qutulushigha bolghan tilekdashliqini bildürdi.

Melumatlargha asaslan'ghanda, noruz bayrimi xelq'arada iranliqlarning yéngi yil bayrimi dep tonulghan bolsimu, emeliyette köpligen türki'iy xelqler, jümlidin Uyghurlarningmu en'eniwi bayrimidur. Noruz bayrimi her yil 3-ayning 21-küni ötküzülidu. 2010-Yil birleshken döletler teshkilati bu künni “Xelq'ara noruz küni” dep resmiy étirap qilghan. Amérika prézidénti obama dewridin bashlap aqsarayda noruz bayrimi tebrik sözi qilish dawamliship kelgen.