Amérika mu'awin prézidénti “Kurd ishchilar partiyesi” ning türkiyege tehdit ikenlikini éytti

Türkiyede ziyarette boluwatqan amérika mu'awin prézidénti jow baydin “Kurd ishchilar partiyesi” (PKK) ni “Op'ochuq térror guruppisi” dep eyiblidi we uning islam döliti teshkilatigha oxshashla türkiyening dölet xewpsizlikige tehdit ikenlikini éytti.

U, bu sözlerni 23 - yanwar türkiye bash ministiri ehmet dawut'oghlu bilen istanbulda körüshkende utturigha qoydi we térrorluqqa qarshi turushta téximu yéqindin hemkarlishidighanliqini bildürdi.

Jow baydin mundaq dédi: “Biz siler bilen shuninggha qoshulumizki, ‛da'ish‚, ‛ kurd ishchilar partiyesi ‚, ‛alnusra‚, qatarliqlar qilmishliri tüpeyli heqiqiy térror guruppiliridur.”

“Kurd ishchilar partiyesi” (PKK) amérika, yawropa ittipaqi qatarliqlar teripidin térror teshkilati dep en'ge élin'ghan bolup, mezkur teshkilat yéqindin buyan türk qoralliq küchlirige qaritilghan hujumlarni kücheytken idi.

Bu heqte toxtalghan jow baydin “Da'ish” türkiyege sirtqi tehdit bolsa, “Kurd ishchilar partiyesi” (PKK) ning türkiyege oxshashla tehdit ikenlikini bildürdi.

U mundaq dédi: “Ular op'ochuq bir térror guruppisi we ularning izchil shughullinip kéliwatqini heqiqet qebihdur.”

Türk bash ministiri dawut'oghlumu enqere da'irilirining “Da'ish”, “Elnusra” “Kurd ishchilar partiyesi” (PKK) qatarliqlarni pütüley oxshash, dep qaraydighanliqini alahide tekitlidi.

Türkiye “Kurd ishchilar partiyesi” - (PKK) we “Da'ish” qa qarishi amérika bilen oxshash mewqede bolsimu, emma amérikining süriye chégrasi ichidiki kurd qoralliq teshkilati - “Xelq qoghdinish qismi” yeni (YPG) bilen bolghan hemkarliqidin ensireydiken.

Xewerlerde körsitishiche, türkiye “Xelq qoghdinish qismi” ni “Kurd ishchilar partiyesi” ning bir qismi dep qaraydiken.