Президент байдин хитай рәис ши җинпиң билән телефонлашқан

Вашингтондин мухбиримиз ирадә тәйярлиди
2024.04.02

Америка ақсарайниң баянат беришичә, америка президенти җо байдин хитай дөләт рәиси ши җинпиң билән телефонда көрүшкән. 2-Апрел күни әтигәндә президент байдин телефонда хитайниң җәнубий деңизда филиппинға қаратқан қутратқулуқ һәрикити, униң русийәниң украинадики таҗавузчилиқини қоллиши, хоңкоңниң йеңи бихәтәрлик қануни вә тәйвән мәсилиси қатарлиқ муһим мәсилиләр бойичә сөзләшкән.

Мәлум болушичә, бу көрүшүш икки дөләт рәһбириниң йеқинқи икки йилдин буянқи тунҗи қетим сөзлишиши болуп һесаблинидикән.

Исмини ашкарилашни халимиған бир ақсарай әмәлдариниң радийомизға ейтишичә, америка малийә министири җәнет йеллен алдимиздики күнләрдә хитайға баридикән, ундин кейинки һәптиләрдә америка ташқи ишлар министири антоний биллинкенму хитайни зиярәт қилидиған болуп, бу телефон сөһбитини бу зиярәтләрдин аввалқи “йоқлаш” дәп аташқа болидикән.

Бу әмәлдар сөзидә, байдин билән ши җинпиңниң америка-хитай мунасивәтлирини җиддийләштүрүватқан мәсилиләр һәққидә сөзләшкәнликини дегән.

Техи йеқинда америка һөкүмити хитайниң бир тор җасуслуқ гурупписиға җаза тәдбири қойған вә униң җасуслуқ паалийәтлириниң кәйнидә хитай һөкүмити барлиқини билдүргәниди.

Америка ақ сарай бу телефон сөһбити һәққидики баянатида, икки рәһбәрниң телефон сөһбитиниң икки дөләт мунасивитини пиланлиқ идарә қилиштин ибарәт мәқсәткә хизмәт қилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.