Билинкенниң икки күнлүк хитай зиярити хитай тәрәпниң қорсақ көпүкини ипадилиши билән башланған

Вашингтондин мухбиримиз ирадә тәйярлиди
2024.04.25

24- Април сәйшәнбә күни хитайниң шаңхәй шәһиригә йетип барған америка ташқи ишлар министири антоний билинкен, 25- апрел пәйшәнбә күни хитайдики икки күнлүк рәсмий зияритини башлиған.

Билинкенниң бу сәпири икки дөләт оттурисида өткән йилдин буянқи әң йеңи вә юқири қатламлиқ дипломатийәлик учришиш болуп һесаблинидикән.

Ройтерс агентлиқиниң хәвәр қилишичә, билинкен пәйшәнбә күни шаңхәй шәһириниң партком секритари чен җинниң билән көрүшкән. У шундақла шаңхәйдики сода рәһбәрлири, шундақла америкалиқ оқуғучилар вә хитай оқуғучилар билән сөһбәтләшкән.

Хәвәрдә дейилишичә, америка ташқи ишлар министири билинкен бу қетимлиқ хитай зияритидә хитай билән нуқтилиқ һалда хитайниң русийә армийәсини қоллаш һәрикитини вә һәр йили йүз миңлиған америкалиқниң җениға замин болуватқан фәнтанил ишләпчиқиришини тосуш мәсилисини сөзлишидикән. Ташқи ишлар министири антоний билинкинму шаңхәйдә туруп тарқатқан синлиқ баянатида, өзиниң бу қетимлиқ зияритиниң мәқсәтлирини тилға елип, “биз хитай билән көз қаришимиз охшимайдиған саһәләрдә йүзму йүз көрүшүш, биваситә пикир алмаштуруш үчүн кәлдуқ. Йүзму йүз дипломатийә интайин муһим” дегән.

Ташқи ишлар министири билинкен шаңхәйгә қәдәм ташлаштин бир қанчә саәт аввал, америка пирезиденти җов байден баш ширкити хитайниң байтдәнс ширкитигә қарашлиқ тикток әпини ана ширкитидин қол үзүшкә қистайдиған қанун лайиһәсини имзалиған иди. Антоний билинкен болса хитайдики зиярити башлаштин бир қанчә күн бурун, ташқи ишлар министирлиқиниң йиллиқ кишилик һоқуқ доклатини елан қилип, “хитай һөкүмитиниң уйғурларға қаритиватқан ирқий қирғинчилиқиниң давам қиливатқанлиқини” тәкитлигән иди.

Хитай, американиң бу һәрикитидин қаттиқ рәнҗигән болуп, шинхуа тори қатарлиқ һөкүмәт таратқулири тәһрират мақалиси елан қилип, “американиң кишилик һоқуқ мәсилисидә хитайға дәрс беришкә салаһийитиниң тошмайдиғанлиқини” илгири сүргән.

Хитай тәрәп, америка ташқи ишлар министири антоний билинкенниң мәхсус айропилани шаңхәй айродурумиға қонғанда, униң билән тәң дәриҗидики әмәлдарни әмәс, бәлки шаңхәй шәһәрлик ташқи ишлар ишханисиниң башлиқини күтүвелишқа чиқириш; қизил паяндаз селип һөрмәт қаравуллирини турғузмаслиқ қатарлиқ дипломатийә әхлақиға зит болған һәрикәтләр арқилиқ, өзиниң қорсақ көпүкини ипадилигән.

BBC Қатарлиқ хәлқаралиқ мәтбуатларда бу зиярәт һәққидә елан қилинған мулаһизиләрдә, билинкенниң хитай зияритиниң асанға тохтимайдиғанлиқи, кәскин вә җиддий өтидиған сөһбәтләрдә зиддийәтни һәл қилидиған көрүнәрлик нәтиҗә чиқмаслиқи мумкинликини пәрәз қилишмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.