Биңтуән парткоми биңтуән билән йәрликниң юғурулушини тезлитишни тәләп қилған

Мухбиримиз әркин
2023.01.27

Хитайниң уйғур елидики “шинҗаң ишләпчиқириш-қурулуш биңтуәни” йеқинда йиғин чақирип, хитайниң мәзкур йерим ишләпчиқириш, йерим қораллиқ тәшкилатиниң иҗтимаий муқимлиқ, узун муддәтлик әминлик вә “шинҗаңни мәдәнийәт билән узуқландуруш” та, районниң ‍иқтисади вә технологийә тәрәққиятида техиму чоң рол ойниши, йәрлик билән биңтуәнни қошиветишни тезлитишни тәләп қилған.

“биңтүән гезити” ниң 27-январ хәвәр қилишичә, бу чақириқ биңтуән парткоминиң 12-январ чақирилған 8-нөвәтлик-4 омуми йиғинида оттуриға қоюлған. Лекин хәвәрдә, бу йиғинниң роһи немә үчүн әмди хәвәр қилинғанлиқиға чүшәнчә берилмигән.

“биңтүән гезити” ниң ейтишичә, йиғинда уйғур аптоном районлуқ парткомниң секритари ма шиңруйниң тәлипи йәткүзүлүп, униң “бу йиллиқ хизмәтни асаси нуқтиға мәркәзләштүрүшни, биңтуәнниң тәрәққияти партийә вә дөләтниң омумий истиратегийәсигә капатлик қилиши, ислаһатни чоңқурлаштуруп, биңтуәнниң чеграни қоғдаштики ролини илгири сүрүш, йәрлик билән биңтуәнниң қошуветилиши вә биңтуәнниң юқири сүпәтлик тәрәққияти қатарлиқ нуқтилиқ хизмәтләр” ни ишқа ашурушни тәләп қилғанлиқи тәкитләнгән. Хитай һөкүмити 2017-йили башланған чоң тутқун билән бир вақитта, биңтуәнни җәнубқа кеңәйтиш, биңтуән билән йәрликни қошуветишни оттуриға қоюп, биңтуәнниң райондики сиясий, иқтисадий, йәр-земин, байлиқ, бихәтәрлик, нупус җәһәтләрдики тәсирини зор дәриҗидә ашурған.

Биңтуән бу җәрянда уйғурларни кәң көләмдә тутқун қилип, лагер, түрмиләргә қамашта актип рол ойниған. Америка һөкүмити 2020-йили биңтуәнниң уйғурларни бастурушта ойниған роли сәвәблик имбарго йүргүзгән иди. Лекин бу қетимлиқ йиғин, биңтуәнниң “партийәниң йеңи дәврдики шинҗаңни башқуруш истратегийәси вә биңтуәнниң орниға болған тәлипини толуқ һәм тоғра иҗра қилип, шинҗаң хизмитиниң асаси нишаниға мәркәзлишиш” ни, йәрлик билән биңтуән қошулуп тәрәққий қилишни чиқиш нуқта қилип, “шинҗаң хизмитиниң баш нишаниға йетиштә техиму чоң рол ойниши” ни тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.