Биңтуән 3-дивизийәси тумшуқ шәһиридә 950 миң мо йәргә кевәз теримақчи болған

Уйғур райониниң терилғу йәр көлиминиң зор бир қисмини қошувалған биңтуән йеқинқи йилларда өзиниң башқурушидики йәрләрни үзлүксиз кеңәйтиватқан болуп, йәр әң қис болған қәшқәрму биңтуәнниң кевәз териш базисиға айланған.

“хитай хәвәрлири тори” ниң 4-апрел күни чиқарған хәвиридә ейтилишичә, биңтуән 3-девизийәси тумшуқ шәһири 950 миң мо йәргә кевәз териған.

Бу хәвәрдә заманиви кевәз териш мәшғулати алаһидә тәшвиқ қилинған болуп, кевәз териштин башлап суғурушқичә һәммә ишниң машинилашқанлиқи, кевәзгә дора чачқанда адәмсиз учқу (дрон), пахта тәргәндә пахта териш машиниси ишқа селинидиғанлиқи, һечкимниң мәҗбурий әмгәккә селинмайдиғанлиқи көрситилмәкчи болған.

Униңдин башқа, бу хәвәрдә тилға елинған биңтуән 3-девизийәси тумшуқ шәһири уйғур районида кәйни-кәйнидин барлиққа келиватқан биңтуән шәһәрлириниң бирси болуп, “биңтуән билән йәрлик бир шаһмат тахтиси болуш” сияситиниң намайәндиси икәнлики көрүнүп туриду.

Мәлуматларға қариғанда, хитайниң 1995-йил елан қилған “биңтуәнни ислаһ қилиш вә тәрәққий қилдуруш” қарари биңтуәнни җәнубта кеңәйтиш пилани болуп, шуниңдин башлап, қәшқәр вә хотәндики уйғурларниң азғинә терилғу йериму биңтуәнниң қолиға өтүп кәткән. Туңган анализчи ма җү әпәнди бу һәқтә тохталғинида, “биңтуәнниң кеңийиши вә күчийиши хитайниң шу земиндики мустәмликичилик һәрикитиниң күчәйгәнликидин дерәк бериду” дегәниди.