Ш у а р парткомниң 10-нөвәтлик 3-омумий йиғинида “биңтуән билән йәрликни бир шаһмат тахтисиға айландуруш” оттуриға қоюлған

Мухбиримиз әзиз
2022-05-17
Share

Хитай һөкүмити башқуришидики “шинҗаң гезити” ниң 17-майдики санида ейтилишичә, уйғур аптоном районлуқ һөкүмәт 15-май күни 12-нөвәтлик омумий йиғинини чақирған. Уйғур аптоном райониниң рәиси әркин тунияз риясәтчилик қилған бу йиғинда “рәис ши җинпиңниң қанунчилиқ идийәсини чоңқур өгиниш, шундақла аптоном районлуқ парткомниң 10-нөвәтлик 3-омумий йиғининиң роһини толуқ изчиллаштуруп омумиййүзлүк қанунчилиқ қурулушини күчәйтиш лазим,” дегән баш йетәкчи идийә оттуриға қоюлған.

Хәвәрдә бу қетимқи қанунчилиқ қурулушини күчәйтиш һәққидики бәлгилимиләрниң уйғур аптоном районлуқ парткомниң 10-нөвәтлик 3-омумий йиғинида алаһидә оттуриға қоюлған орунлаштуруш икәнлики, шундақла буниң “партийәниң йеңи дәврдики шинҗаңни идарә қилиш истратегийәсиниң муһим капалити” икәнлики ейтилған. Шуниң билән биргә бу қетимлиқ йиғинда “биңтуән билән йәрликни бирләштурүштәк йеңи вәзийәт” ни яритиш үчүн “биңтуән билән йәрлик бир тахта шаһмат тахтисидәк иш көрүш” алаһидә тәкитләнгән.

Хитай һөкүмитиниң лагер системиси, заманиви қуллар әмгики һәмдә қанунсиз болған зор көләмлик тутқунни бихараман иҗра қилип туруп, йәнә мушу хилдики “қанунчилиқ қурулуши” һәққидә давраң селиши изчил һәрқайси саһәниң кәскин мәсхирисигә вә тәнқидигә дуч кәлгән иди. Австралийәдики хитай өктичи зиялилиридин вики шү бу һәқтә радийомиз зияритини қобул қилғанда: “хитай һөкүмитиниң уйғур районида қанун билән идарә қилишни әмәлгә ашуримиз, дегини заманимиздики әң чоң қара юмурларниң бири” дегән иди. Бу қетимқи хәвәрдә алаһидә тилға елинған “аптоном районлуқ һөкүмәтниң аптоном районлуқ парткомниң орунлаштурушини иҗра қилип қанунчилиқ қурулушини күчәйтимиз” дегәнликиниму бәзиләр “хитай өзи түзүп чиққан аптономийә қанунини ашкара дәпсәндә қилиштин башқа нәрсә әмәс” дәп қаримақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт