Bélgiye parlamént ezasi, meblegh fondlirini bingtu'en'ge chétishliq shirketler bilen bolghan alaqisini üzüshke chaqirdi

Bélgiye parlamént ezasi samu'él kogolati xitayning “Shinjang ishlepchiqirish-qurulush bingtu'eni” ge chétishliq shirketlerge meblegh salghan bélgiye meblegh fundlirini “Ikki yüzlimichilik” bilen eyiblep, bu shirketler bilen bolghan alaqisini üzüshke chaqirghan. “Politika” gézitining xewer qilishiche, samu'él kogolati, besh bélgiye meblegh fundining Uyghurlarni basturushqa hemkarlashqan “Shinjang ishlepchiqirish qurulush bingtu'eni” ge chétishliq xitay shirketlirining pay chékini sétiwalghanliqigha da'ir höjjetlerni körsitip, xitayning mezkur yérim qoralliq ishlepchiqirish apparatigha amérika we yawropa ittipaqi teripidin émbargo qoyulghanliqini bildürgen.

“Politika” gézitining xewiride, hallam shiféld uniwérsitéti tetqiqatchilirining bingtu'enni xitayning “Yer igilleshke mes'ul mustemlikichilik apparati” dep körsetkenliki tekitlen'gen. Melum bolushiche, bélgiye parlaméntining yéshillar partiyesidin bolghan we parlaméntning Uyghurlarni “Irqiy qirghinchiliq xewpidiki xelq” dep étirap qilishida achquchluq rol oynighan kogolati, 4 banka, bir sughurta shirkitige mensup bolghan meblegh fundlirining bir qanche ayliq maliye doklatini tekshürgendin kéyin, ularni xitay shirketliridin qol üzüshke chaqirghan. Xewerde, bu meblegh fundlirining londonni baza qilghan “Shirodérs” namliq meblegh sélish shirkiti teripidin bashqurulidighanliqi bildürülgen.

“Politika” gézitining xewiride éytilishiche, samu'él kogolati mundaq dégen: “Bélgiye bankiliri emdi nadanliqni bahane qilmasliqi kérek. Ular meblegh salghan xitay shirketliri amérikaning qara tizimlikidiki yaki yawropa ittipaqi émbargo yürgüzgen shinjang ishlepchiqirish-qurulush bingtüenige ochuq-ashkara chétishliq shirketler we yaki mejburiy emgekte jawabkarliqi bar, dep eyiblen'gen shirketlerdur” dégen. Melum bolushiche, bélgiye meblegh fondi meblegh salghan orunlarning biri “Xitay yéza igilik bankisi” bolup, bu bankining bingtüende nurghun tarmaq shöbisi bar iken.