Bingtu'enning 2022-yilliq xizmet orunlashturushida jenubqa kéngiyish we qoralliq küchlirini kücheytish nishan qilin'ghan

Muxbirimiz erkin
2021-12-21
Share

Xitay da'iriliri ötken hepte ‍ürümchide yighin ötküzüp, xitayning rayondiki yérim qoralliq yérim ishlepchiqirish teshkilati bolghan “Shinjang ishlepchiqirish-qurulush bingtu'eni” ning 2022-yilliq xizmetlirini orunlashturghan. Xitay taratqulirining éytishiche, bingtu'enni dawamliq jenubqa kéngeyish, uning qoralliq küchi bolghan “Xelq eskerliri” ni kücheytish we bingtu'enni yerlik bilen birgewdileshtürüsh uning kéler yilliq xizmetlirining muhim nishani iken.

Melum bolushiche, bu orunlashturush bingtu'en partkomining 17-we 18-dékabir künliri chaqirilghan 7-nöwetlik 13-omumiy yighinida otturigha qoyulghan. Uyghur aptonom rayonluq partkomning sékritari, qoshumche bingtu'en partkomining birinchi sékritari we siyasiy komissari bolghan chén chu'en'go söz qilghan bu yighinda, bingtu'enning siyasiy komissari li yiféy bilen bingtu'enning qomandani péng jyaruy bingtüenning kéler yilliq xizmetlerni orunlashturghan.

Bingtüen partkomining bu nöwetlik yighini amérika hökümiti erkin tuniyazni öz ichige alghan 4 neper xitay emeldarigha imbargo qoyghan, dölet mejlisi “Uyghur mejburi emgikining aldini élish qanun layihesi” üni maqullap, prézidéntning imza qoyushigha sun'ghan bir waqitta ötküzülgen. “Bingtu'en xewerliri” torining ashkarlishiche, yighin “Muqimliq we chégrani qoghdashqa ehmiyet bérip, chégra rayon mudapiye iqtidarini muqimlashturush, yuqiri sewiyelik bixeter bingtu'en qurup, aliy süpetlik xelq eskerler qoshuni berpa qilish” ni telep qilghan.

Yighinda yene bingtu'enning “Jenubqa qarap tereqqiy qilishini tézlitish, bazarni zoraytish, bingtu'en bilen yerlikning bir gewdilishish tereqqiyatini chongqurlashturush, bingtu'en bilen yerlikni bir gewdileshtürüshning tüzülme méxanizimini mukemmelleshtürüp, uning bir gewdilishishini ilgiri sürüsh” telep qilin'ghan.

Közetküchilerning éytishiche, xitay bingtu'enni yerlik bilen birleshtürüsh arqiliq, Uyghur aptonom rayonini shekilde mewjut, emeliyette bingtu'enning kontrolluqidiki bir rayon'gha aylandurup qoyushni pilanlimaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet