Xitayning bingtu'ende qoy baqmichiliqini teshebbus qilishi diqqet qozghidi

Muxbirimiz irade
2022.12.22

Xitayning Uyghur élide turushluq ishlepchiqirish-qurulush armiyesi bingtu'ende qoy baqmichiliqi kespini tereqqiy qildurush teshebbus qilinishi diqqet qozghidi.

Xitay xewerler tori 21-dékabir küni tarqatqan bir xewiride, Uyghur élide turushluq bingtu'enning déhqanchiliq meydanlirida yéqinqi yillarda “Qoy tawargha aylinish” istratégiyesi zor küch bilen ilgiri sürüp, qéliplashqan qoy béqishning modéllirini tetqiq qilghanliqi we tériqchiliq, baqmichiliq, qoy mehsulatlirini pishshiqlap ishlesh, oghut qatarliq yéshil sana'et zenjirini shekillendürgenliki bayan qilghan.

Xewerde, 2021-yili eskerdin chékin'gendin kéyin qoy baqmichiliqigha bashlighan jaw shöjüenning ikki yilgha yetmigen waqit ichide her yili 10 minggha yéqin qoy satidighan “Ayal padichi” gha aylan'ghanliqi misal qilin'ghan hem shundaqla nöwette qoy göshige bolghan telepning intayin yuqiri ikenliki, bu qoylarning biwasite sétish dukanliri hemde tor arqiliq béyjing, shangxey, gu'angju we bashqa ölkilerdiki xéridarlargha sétiliwatqanliqi bayan qilin'ghan.

Xitay taratquliri yéqinqi bir qanche yildiki xewerliride Uyghurlar eng zich olturaqlashqan jenubta choshqa baqmichiliqi igilikining kéngeytilidighanliqi toghruluq hedep kéngeytiwatqan bir peytte, xitaylar igiligen bingtüende qoy baqmichiliqini teshebbus qilishi diqqet qozghimaqta. Tetqiqatchi adriyan zénz ilgiri el-jezire téléwiziyesige qilghan sözide Uyghur élide yéza igilik tereqqiyatining “Dinsizlashturush” ning birqismigha aylan'ghanliqi, xitayning Uyghur élide choshqa baqmichiliqini ilgiri sürüsh we kéngeytish üchün aktip tirishchanliq körsitiliwatqanliqini tekitligenidi.

Uning üstige, ichkiri ölkilerde qoy göshige bolghan telepning ösüshining Uyghur élidiki Uyghur qatarliq musulman milletlerning qoy göshi istimaligha qandaq tesir körsitidighanliqimu muhim bir mesile dep qaralmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.