Өткән бир йилда 14 миң оқуғучи биңтуән системисиға ишқа чүшкән

Хитай һөкүмити башқуришидики “биңтуән хәвәрлири” гезитиниң 16-февралдики хәвиридә ейтилишичә, 2022-йилидин буян 14 миңдин артуқ оқуғучи биңтуән системисидики һәрқайси идарә вә органларға кадир болуп орунлашқан.

Хәвәрдә ейтилишичә, һәрқайси алий мәктәпләрни пүттүргән оқуғучилар һәр дәриҗилик биңтуән тармақлириниң “алди билән ишқа орунлаштуруш истратегийәсини иҗра қилиш” сиясити бойичә нуқтилиқ һалда биңтуән системисиға орунлаштурулған. Биңтуән адәм күчи байлиқи вә иҗтимаий параванлиқ идарисиниң мәсуллиридин җиң әнйән: “бу йил хизмәткә елинғанлар ишқа орунлаштуруш пурситини көпәйтиш вә хизмәт орни мааш толуқлимиси тарқитиш сиясити бойичә талланди” дегән.

Һалбуки, алий мәктәпни тамамлиған уйғур оқуғучиларниң хитайчә вә уйғурчә тилларға пухта болушиға қаримай изчил ишсизлиқниң дәрдини тартип келиватқини, һәтта бир қисим җайларда ашкара һалда “хитайларла қобул қилиниду” дегәндәк хизмәт еланлириниң чиқирилиши, изчил һәр саһә кишилириниң тәнқид обекти болуп келиватқанлиқи мәлум. Бир қисим мутәхәсисләр “дөләт ичидики дөләт” дәп атаватқан биңтуән системиси уйғур дияридики қирғинчилиқни иҗра қилишта һәмдә уйғур дияриға хитай нопусини көчүрүштә әң чоң рол ойнаватқанлиқи үчүн, америка башчилиқидики бир қисим ғәрб дөләтлири униңға җаза елан қилған иди.

Хитай һөкүмити йеқинқи йилларда изчил “биңтуән билән йәрликни юғуриветиш” һәққидә иш көрүватқан болуп, буниңда уйғур аптоном районлуқ һөкүмәт билән биңтуән системисини бирләштүрүш ахириқи нишан қилиниватқанлиқи мәлум. Шу сәвәбтинму хитай мәркизи һөкүмити һәр йили биңтуән системисиға ғайәт зор мәбләғ ‍аҗритип, биңтуәнниң нопус көчүрүш иқтидарини һәмдә һакимийәт қурулмисини техиму күчәйтишкә күч сәрп қилип кәлмәктә.