Ötken bir yilda 14 ming oqughuchi bingtu'en sistémisigha ishqa chüshken

Xitay hökümiti bashqurishidiki “Bingtu'en xewerliri” gézitining 16-féwraldiki xewiride éytilishiche, 2022-yilidin buyan 14 mingdin artuq oqughuchi bingtu'en sistémisidiki herqaysi idare we organlargha kadir bolup orunlashqan.

Xewerde éytilishiche, herqaysi aliy mekteplerni püttürgen oqughuchilar her derijilik bingtu'en tarmaqlirining “Aldi bilen ishqa orunlashturush istratégiyesini ijra qilish” siyasiti boyiche nuqtiliq halda bingtu'en sistémisigha orunlashturulghan. Bingtu'en adem küchi bayliqi we ijtima'iy parawanliq idarisining mes'ulliridin jing enyen: “Bu yil xizmetke élin'ghanlar ishqa orunlashturush pursitini köpeytish we xizmet orni ma'ash toluqlimisi tarqitish siyasiti boyiche tallandi” dégen.

Halbuki, aliy mektepni tamamlighan Uyghur oqughuchilarning xitayche we Uyghurche tillargha puxta bolushigha qarimay izchil ishsizliqning derdini tartip kéliwatqini, hetta bir qisim jaylarda ashkara halda “Xitaylarla qobul qilinidu” dégendek xizmet élanlirining chiqirilishi, izchil her sahe kishilirining tenqid obékti bolup kéliwatqanliqi melum. Bir qisim mutexesisler “Dölet ichidiki dölet” dep atawatqan bingtu'en sistémisi Uyghur diyaridiki qirghinchiliqni ijra qilishta hemde Uyghur diyarigha xitay nopusini köchürüshte eng chong rol oynawatqanliqi üchün, amérika bashchiliqidiki bir qisim gherb döletliri uninggha jaza élan qilghan idi.

Xitay hökümiti yéqinqi yillarda izchil “Bingtu'en bilen yerlikni yughuriwétish” heqqide ish körüwatqan bolup, buningda Uyghur aptonom rayonluq hökümet bilen bingtu'en sistémisini birleshtürüsh axiriqi nishan qiliniwatqanliqi melum. Shu sewebtinmu xitay merkizi hökümiti her yili bingtu'en sistémisigha ghayet zor meblegh ‍ajritip, bingtu'enning nopus köchürüsh iqtidarini hemde hakimiyet qurulmisini téximu kücheytishke küch serp qilip kelmekte.