«Биңтуән» дә орманлиқларни бузуп йәр ечиш қилмишлири давамлашмақта

Мухбиримиз үмидвар
2017-12-31
Елхәт
Пикир
Share
Принт

Уйғур дияридики йәрлик хәлқләр тәрипидин «қораллиқ деһқанлар» дәп аталған ишләпчиқириш қурулуш армийиси уйғур диярида пәйда болған йерим әсирдин артуқ вақит җәрянида асаслиқ дәря вадилири, су мәнбәлирини контрол қилип, боз йәр өзләштүрүш намида йәр ечиш җәрянида зор миқдардики тәбиий орманлиқлар, яйлақлар вә тарим вадисидики тоғрақлиқларниң, җүмлидин екологийилик муһитниң бузғунчилиққа учриғанлиқи йәрлик хәлқләр тәрипидин изчил тәнқидкә учрап кәлгән иди. Ишләпчиқириш қурулуш армийиси даирилири йеқинқи йиллардин буян һәр тәрәпләрдин келиватқан тәнқидләр түпәйлидин бир қисим полкларда садир қилинған бу хил екологийилик муһитни бузуш қилмишлирини чәкләшкә киришкән.

«Биңтуән гезити» ниң бир хәвиридә көрситилишичә, бу йил 6-айда ишләпчиқириш қурулуш армийиси интизам тәкшүрүш комитети 3-дивизийәсидики бир қисим мәсул кишиләрни җазалиған болуп, уларниң ичидики 17 адәмгә партийә ичидә агаһландуруш вә мәмурий җаза бәргән, бу йил 9-айда болса, 9-дивизийәниң 168-полкидики 6 мәсул кадирни тәнқидлигән. Җазаға учриған мәзкур мәсулларниң һәммиси орманлиқни вәйран қилип, қалаймиқан боз йәр ечип, екологийилик муһитни еғир дәриҗидә бузуш қилмиши билән әйибләнгән.

Хәвәрдин мәлум болушичә, биңтуән 2009-йилидин буян бир қатар қалаймиқан йәр ечиш, екологийилик муһитни бузуш қатарлиқ қилмишларни контрол қилишқа аит бәлгилимиләрни чиқиришқа мәҗбур болған болсиму, әмма бәзи полкларда буниңға риайә қилмай, орманлиқларни вәйран қилип, боз йәр ечиш вә башқа муһитқа зиянлиқ һәрикәтлири давамлишивәргән.

Пикирләр (0)
Share
Толуқ бәт