Уйғур аптоном райони биңтуәнгә мәмурий қанун йүргүзүш һоқуқи бәргән

Мухбиримиз әзиз
2017-12-29
Елхәт
Пикир
Share
Принт

Уйғур аптоном районлуқ хәлқ қурултийи йеқинда қарар мақуллап, шинҗаң ишләпчиқириш-қурулуш биңтуәнигә хәлқ қурултийи хизмәт комитети тәсис қилишини вә униңға мәмурий қанун йүргүзүш һоқуқи беришни тәстиқлиған.

Мәзкур қарар уйғур аптоном районлуқ хәлқ қурултийиниң бу йил 29‏-ноябир өткүзүлгән 33‏-нөвәтлик йиғинида мақулланған болсиму, әмма бу хәвәр хитай ахбарат васитилириниң әмди диққитини қозғиған. Уйғур аптоном районлуқ хәлқ қурултийиниң қарарида көрситилишичә, биңтуән хәлқ қурултийи хизмәт комитети аптоном районлуқ хәлқ қурултийиниң вакаләт оргини болуп, у биңтуәнниң иҗтимаий, иқтисадий, муқимлиқ җәһәтләрдики еһтияҗиға асасән аптоном районлуқ хәлқ қурултийиға қанун тәклипи сунуш, биңтуәндики мәмурий, әдлийә органлириниң алақидар қанунларни иҗра қилиш әһвалини назарәт қилиш қатарлиқ һоқуқларни йүргүзидикән. 

Шинҗаң ишләпчиқириш-қурулуш биңтуәни 1954‏-йили хитай азадлиқ армийисиниң бир қисим әскәрлири вә гоминдаңниң уйғур районида әсиргә чүшкән әскәрлиридин қурулған. У 1975‏-йили «уйғур аптоном районлуқ һөкүмәтниң хизмитини нормал йүргүзүшигә тосалғу болғанлиқи» үчүн бир мәзгил тарқитиветилгән. У 1982‏-йили йәнә әслигә кәлтүрүлгән болсиму, әмма униңға һечқачан қанун йүргүзидиған бир дәриҗилик мәмури гәвдә, дегән штат берилип бақмиған. Бейҗиң һөкүмити пәқәт 2009‏-йили «5‏-июл вәқәси» дин кейин униңға рәсмий бир дәриҗилик мәмури гәвдә штат бәргән. Бирақ бәзи мутәхәссисләр, бейҗиң һөкүмитиниң бу қарари униң алақидар қанунлириға хилап икәнлики, бу уйғур аптоном райониниң өз фонкисийәсини җари қилдурушиға тосқунлуқ қилидиғанлиқини агаһландуруп кәлгән. Хитай ахбарат хәвәрлиридә қәйт қилинишичә, биңтуән хәлқ қурултийи хизмәт комитетиниң әзалири 11 дин 15 кечә кишидин тәшкил тапидикән. Хәвәрдә, уларни аптоном районлуқ хәлқ қурултийи тәйинләйдиғанлиқини билдүргән.

Пикирләр (0)
Share
Толуқ бәт