“бир бәлвағ бир йол” барғансери халта кочиға айлинип қалмақта

Мухбиримиз әзиз
2020-03-04
Share

Хитай һөкүмити ғайәт зор мәбләғ салған “бир бәлвағ бир йол қурулуши” ниң бир тәркиби қисми сүпитидә қәшқәрдин пакистандики гуадар портиғичә болған арилиққа созулған “хитай-пакистан иқтисадий каридори” нөвәттә барғансери халта кочиға айлинип қалмақта икән.

“яху хәвәрлири” ниң 4-марттики мақалисидә көрситилишичә, мәзкур иқтисадий каридор хитай һөкүмитиниң сәуди әрәбистани билән болған нефит импорт йолиниң уйғур дияридин өтидиған йәнә бир капалити болуп, бу “каридор” үчүн 62 милярд америка доллири мәбләғ селиш пиланланған икән. Дәсләптә бу каридорниң ташйол, төмүрйол, туруба йоллири, айродром қатарлиқ бир йүрүш әслиһәләрдин тәркиб тапқан ғайәт зор қурулуш болидиғанлиқи һәққидә дәбдәбилик баянатлар вә хәвәрләр елан қилинған болсиму, аридин йәттә йил өткән бүгүнки күндә буниң пәқәт азғинә қисмидин башқисиниң техичә қәғәз йүзидики лайиһә һалитидә туруватқанлиқи мәлум болмақта.

Мақалида көрситилишичә, пакистан һөкүмити дуч келиватқан мәбләғ йетишмәслик, чириклик вә гуадар порти җайлашқан балучи өлкисидики пакистан һөкүмитигә қарши қораллиқ күчләрниң паракәндичилики қатарлиқлар буниңдики муһим сәвәбләрдин икән. Йәнә бир яқтин хитай һөкүмити өткән он нәччә йил мабәйнидә изчил иқтисадий җәһәттики төвәнләшни баштин кәчүрүватқан болғачқа буниңға башқа тәрәптин җавабкар болмақта икән. Йәнә келип йеқинқи америка-хитай сода уруши вә һазир юқири пәллигә чиқиватқан таҗсиман вирусниң балайиапити хитайни иқтисадий җәһәттин техиму паракәндә қилмақта икән.

“өлмәк үстигә тәпмәк” дегәндәк йеқиндин буян кенийә, малайсия, сириланка қатарлиқ дөләтләр арқиму-арқидин хитайниң нәччә милярд долларлиқ қурулуш тохтамлирини бикар қиливәткән болуп, “қәрз қапқини” мәсилиси барғансери көп дөләтләрни, җүмлидин пакистанни һошярлиққа үндимәктә икән. Вашингтон шәһиридики “туташ асия” ақиллар мәркизиниң тәтқиқатчиси хилман бу һәқтә сөз қилип: “мениңчә, ‛бир бәлвағ бир йол‚ қурулуши деңизда өлүп қалмаслиқи мумкин. Әмма униң қуруқлуқта нәгә баралиши бәкму гуманлиқ,” дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт