Пакистандики «бир бәлвағ бир йол» қурулуши йеңидин «миқ» қа үсти

Мухбиримиз әзиз
2020-10-28
Елхәт
Пикир
Share
Принт

Хитай һөкүмитиниң ғайәт зор мәбләғ селиши билән башланған «бир бәлвағ бир йол» қурулушиниң муһим түрлиридин болған пакистандики төмүр йол қурулуши пакистан һөкүмитиниң өсүм нисбитини төвәнлитиш тәлипи рәт қилинғанлиқтин тохтап қалди.

«японийә иқтисад хәвәрлири» гезитиниң 28-өктәбирдики мақалисидә көрситилшиичә, пакистандики «1-ғол линийә төмүр йол қурулуши» нөвәттә зор дағдуға билән давам қиливатқан «пакистан-хитай иқтисадий каридори» бәрпа қилиш хизмитидики әң чоң қурулуш икән. 2655 Километир узунлуқтики бу төмүр йол қурулуши карачи билән пишавур районини бир-биригә бағлайдиған болуп, бу қурулушниң омумий тәннәрқини хитай һөкүмити 6. 8 Милярд америка доллири дәп баһалиған. Икки тәрәп имза қойған келишимдә «бу мәбләғниң 10 пирсәнтини пакистан чиқириду, қалған 90 пирсәнтини хитай һөкүмити пакистанға қәрз бериду» дәп бекитилгән. Тохтамда бу қурулушниң 2021-йили январ ейида рәсмий иш башлайдиғанлиқи ейтилған.

Нөвәттә хитайдин елинидиған ғайәт зор қәрзниң өсүм нисбити тоғрисида пакистан һөкүмити «әң көп болғанда бир пирсәнттин ешип кәтсә болмайду» дәп чиң турмақта икән. Әмма хитай һөкүмити болса бу өсүм нисбитини «бәк төвән болуп қалди» дәп қариғанлиқтин қәрз рәсмийәтлири тохтап қалған. Варшавадики «уруш тәтқиқат университети» ниң тәтқиқатчиси кризистов иванек бу һәқтә сөз қилип: «хитай һөкүмити һәрқачан мушу хилдики ‹мәбләғ селиш' васитиси билән қошна дөләтләрни қәрз қапқиниға дәсситип кәлгән,» дегән. Хәлқара пул-муамилә фонди пакистан һөкүмитигә бир қетимда икки йерим милярд америка доллиридин көп қәрз бәрмәсликни қарар қилғачқа, пакистанниң чәт әлдин қәрз елиш имканийитиму чәклик болмақта икән. Һалбуки, йәнә бир қисим иқтисадшунаслар болса «хитай мушу хил васитә арқилиқ пакистанни техиму сизған сизиқтин чиқмайдиған қилип қоймақчи болуватиду,» дейишмәктә икән.

Пикирләр (0)
Share
Толуқ бәт