Xitayning bir jasus gumandari bostonda qolgha élindi
2023.05.10
Yéqindin buyan xitayning chet'ellerge sozulghan qara qoli we jasusluq tori, shundaqla buninggha ispat süpitide tutulghan xitay jasus gumandarliri heqqide xewerler köpeymekte.
“Boston awan'gart géziti” torining 9-may küni bergen xewiride éytilishiche, amérika fédératsiye tekshürüsh idarisi xadimliri bostonda yashawatqan bir xitay kishini jasus gumandari dep qolgha alghan.
Amérika fédératsiye tekshürüsh idarisining eyiblishige qarighanda, bu yil 64 yashqa kirgen lyang litang isimlik bu xitay, amérika edliye ministirlikige melum qilmighan ehwalda xitay hökümitining wekili boluwalghan.
Eyibnamide bildürülüshiche, lyang litang xitayning nyu-york konsulxanisidiki bir yardemchi we bashqa xitay emeldarliri bilen hemkarliship, xitay hökümiti nishan'gha alghan shexslerni chaygha teklip qilghan, yeni ularni izdep paranglashqan we tehdit salghan.
Lyang litang xitayning nyu-yorkta turushluq konsuli arqiliq xitay hökümitige bostondiki her türlük teshkilat we ademlerning uchurini yetküzgen؛ bostonda yashawatqan xitay öktichiliri we démokratiyege mayil kishilerge qarshi pa'aliyet teshkilligen hemde öktichilerni toplighan pa'aliyetchilerning arxipini xitay tashqi ishlar ministirlikige teminlep bergen.
Liyang litang 2019-yil 9-ayda boston kutupxanisida xitay öktichilirini oghriliqche resimge tartqan. U 2018-yildin 2022-yilghiche bu herikitini dawamlashturghan؛ pa'aliyet da'irisi barghanche kéngiyip, téximu köp yuqiri derijilik xitay emeldarliri bilen alaqilishishke bashlighan. 2019-Yil 1-ayda u bashqilar bilen birliship, “Xitayni tinch birlikke keltürüsh ittipaqi” qurghan we uning mu'awin re'isi bolghan.