«Бир йол бир бәлвағ мәбләғ селиш истратегийәси» ниң хитай вә дуня банка системисиға тәһдит туғдуридиғанлиқи илгири сүрүлмәктә

Мухбиримиз җүмә
2017-08-26
Share

Хитай башлиған «бир йол бир бәлвағ мәбләғ селиш истратегийиси» ниң хитай банка системилириғила әмәс, бәлки дуня банка системисиға тәһдит туғдуридиғанлиқи илгири сүрүлмәктә.

Ройтерста бу һәқтә берилгән бир мулаһизигә қариғанда, дөләт игидарчилиқидики чоң банкилар хитай даирилириниң мәзкур мәбләғ пиланини пул билән тәминләш үчүн йеқин кәлгүсидә мәбләғ топлашни башлайдикән.

Буларниң ичидә хитай қурулуш банкиси, 100 милярд йүән топлаш үчүн һәрикәткә өткән болса, хитай банкиси, сода-санаәт банкиси вә йеза игилик банкилириму мәбләғ топлаш үчүн иш башлиған.

Һалбуки хәвәрдә көрситишичә, әгәр хитай пиланлаватқан «бир йол бир бәлвағ истратегийиси» мәғлуп болуп кәткән тәқдирдә, хитай топлиған бу ғайәт зор миқдаридики мәбләғләр әһдини бузуш яки вәйран болуш хәтиригә йолуқидикән.

Хәвәрдә нәқил елишичә, бейҗиң чеңкоң сода институтидики профессор шу чеңгаң буниң хитай вә дуня банка системисиға тәһдит кәлтүридиғанлиқини билдүргән.

У мундақ дегән: «буниң әкс тәсири хитайға зәрәр берип қалмастин, дуня пул-муамилә системисиғиму зәрәр бериду.»

Униң ейтишичә йәнә, хитай һөкүмитиниң мәбләғ селиш пиланлири һәтта бәзи хәтәрлик дөләтләрдики зор тәвәккүлчилик тәләп қилидиған түрләргиму кеңәйтилгән. Әгәр бу мәбләғләр шәхсий ширкәтләр тәрипидин селинған болса, униң йоли башқа болуп, әмма хитайниң мәбләғлири дөләттин дөләткә биваситә берилидикән.

Мулаһизидә көрситишичә, бу хил мәбләғ селиш хаһиши пул-муамилә саһәсидә «юмшақ хамчот чәклимиси» дәп атилидикән.

Бу асасән дөләт игидарчилиқидики ширкәтләргә қаритилған болуп, бундақ ширкәтләрниң қануний җәһәттин вәйран болушиға йол қоюлмайдикән. Әгәр бир дөләттә юқири нисбәттә «юмшақ хамчот чәклимиси» һадисиси вә зор миқдарда вәйран болушқа йол қоюлмайдиған ширкәтләр көп болса, булар мәбләғ мәсилисидә қийинчилиққа учрайдикән. Буниң дуня иқтисадиға әкс тәсир көрситиши мумкин икән.

Хәвәргә қариғанда, хитай дөләт игидарчилиқидики ширкәтләр бәк көп дөләтләрниң бири болуп, бу пул муамилә нуқтисидин алаһидә әндишә мәркизи болуп кәлгән.

Хәвәрдә көрситишичә, хитайниң «бир йол бир бәлвағ истратегийиси» бойичә мәбләғ селинидиған дөләтләрниң бәзилири дунядики әң хәтәрлик тәрәққий қиливатқан дөләтләр икән.

Хәвәрдә нәқил қилишичә, бу һәқтә тохталған меркатор хитай тәтқиқат институтиниң муавин рәиси бҗорн конрад мундақ дегән: «(бу түр бойичә мәбләғ селинидиған) көп сандики қурулушларниң илгири көрүлүп бақмиған дәриҗидики мәсилиләргә йолуқидиғанлиқида шәк йоқ.»

У йәнә бу түрләргә селинған мәбләғләрниң вәйран болуш хәтири юқири икәнлики билдүргән вә мундақ дегән: бу хитайниң банка системисиға хәтәр туғдуриду. Бу өз нөвитидә йәнә дуня банка системисиға хәтәр яритиду.»

Аталмиш «бир йол бир бәлвағ истратегийиси» ни хитай рәиси ши җинпиң 2013-йили оттуриға қойған.

Бу һәқтики мәлуматларға қариғанда, мәзкур истратегийә асаслиқи хитайни явро-асия дөләтлиригә қуруқлуқ вә деңиз арқилиқ туташтурушни мәқсәт қилған зор көләмлик мәбләғ селиш турлирини өз ичигә алидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт