Onsu nahiyesining onsu baziri longchwen ahaliler komitéti 1-ayning 8-küni uqturush chiqirip, a'ililerde ishlitidighan pichaq türidiki barliq tighliq saymanlargha igisining kimlik nomurini oyulidighanliqini bildürgen.
Boshün tori arqiliq ashkara bolghan mezkur uqturushta mundaq déyilgen: "Tighliq saymanlargha bolghan bashqurushni kücheytish we ularning yoqap kétishining aldini élish üchün pütün bazardiki tighliq eswablargha igisining kimlik nomuri oyulidu. Buning üchün ahalilerdin töwendikiler telep qilinidu: birinchi, barliq tighliq saymanlarning sani élinishi we ulargha igisining ismi oyulushi, buningdin herqandaq a'ile bash tartmasliqi, hetta bir tal tighliq saymanmu chüshüp qalmasliqi lazim. Ikkinchi, qingraq, qelemtirach, qoy-kala boghuzlaydighan pichaq, palta, kerke, kesküchi we chanighuchi eswablarni öz ichige alghan barliq tighliq saymanlar belgilen'gen orun'gha élip bérilip, igilirining kimlik nomuri oyulushi, buninggha kétidighan 3 som heqni igisi tölishi lazim. Üchinchi, oyush waqti 1-ayning 8-künidin 10-künigiche bolidu. Eger mushu waqitning ichide tighliq saymanlirigha kimlik nomurini oydurmighanlar, saqchixanilarning bir terep qilishigha yollap bérilidu."
Xitay da'irilirining "Muqimliq" ni saqlash we "Ashqunluqqa zerbe bérish" ni bahane qilip, Uyghur diyarida yolgha qoyuwatqan bir qatar külkilik belgilimiliri chet'ellerdiki közetküchilerning küchlük tenqidige duch kelmekte. Ularning tekitlishiche, bu da'irilerning Uyghur élidiki qassaplarning pichaqlirigha zenjir békitish belgilimisidin kéyin chiqarghan yene bir qétimliq tighliq saymanlarni kontrol qilish herikiti iken.
