Bitkoyn sahesidiki "‍Uyghur amili" dawamliq diqqet qozghimaqta

Muxbirimiz eziz
2021-05-31
Share

Yer shari reqemlik pul saheside birinchi orunda turuwatqan bitkoyn (Bitcoin) yéqindin buyan Uyghurlar diyaridiki mejburiy emgek we insaniyetke qarshi jinayetler sewebidin kishilerning diqqet-étibarini qozghashqa bashlidi.

"Blombérg xewerliri" torining 30-maydiki xewirige qarighanda, xitay hökümiti gerche yéqinda reqemlik pul mu'amile sodisini men'i qilghan bolsimu, hazirqi mewjut bitkoynlarning üchtin birini teshkil qilidighan miqdardiki bitkoyinning xitayda qézilishigha qarita héchqandaq tedbir almighan. Xewerde éytilishiche, bu bitkoyinlar Uyghur diyarida qéziliwatqan bolup, bularning qézilishi üchün ishlitilidighan ghayet zor kompyutér torigha kéreklik tolimu erzan bahaliq éléktr énérgiyesige köpligen gumanlar yoshurun'ghan iken. Yene kélip her sahe kishiliri nöwette irqiy qirghinchiliq boluwatidu, dep qariliwatqan bu rayondiki erzan bahaliq bu énérgiyening pütünley kömür köydürüshtin hasil boluwatqanliqini, bu kömürning ishlepchiqirilishigha qanchilik mejburiy emgekning ariliship ketkenlikige bir nerse déyishke bolmaydighanliqini alahide tekitlimekte iken.

Xewerde éytilishiche, Uyghur diyarining kömür qézilishidiki mehsulat sür'iti 2017-yilidin buyan hessilep éship mangghan bolup, bu rayondiki alyumin ishlepchiqirishi we quyash énérgiye taxtisi üchün kéreklik bolghan köktashlarni qézishning sür'iti bilen mas qedemde köpiyip mangghan. Yene kélip bu hal lagérlarning kéngiyishi bilenmu ong tanasip chiqidiken. Shu sewebtin nöwette barghanséri köp sahe bitkoyn heqqide selbiy yönülüshke qarap siljimaqtiken.

Melum bolushiche "Tésla" shirkitining mes'uli élan maskmu bitkoyn heqqide söz qilip "Buning qézilishigha lazimliq énérgiye üchün köp miqdarda kömür köydürilidighanliqi hemde muhitni éghir derijide bulghaydighanliqi üchün bitkoyinni hazirche'tésla'sodisigha ishletmeymiz" dégen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet