Uyghurlar diyaridiki bixeterlik xirajiti shiddet bilen ashmaqta

Muxbirimiz eziz
2018-11-06
Élxet
Pikir
Share
Print

Xitay hökümitining Uyghurlar diyaridiki bixeterlikke serp qiliwatqan xirajetning 2017-yilining ichide ötken mezgildikige qarighanda üch hesse ashqanliqi dunyani yene bir qétim heyran qaldurdi.

Roytérs agéntliqining 6-noyabirdiki xewiride éytilishiche, Uyghurlar diyaridiki bixeterlikke chétishliq xirajetning omumi miqdari 2017-yili 20 milyard som (üch milyard amérika dollirigha yéqin), yeni 213 pirsent ashqan.

Mezkur xulasini amérikidiki jéymis tawn fondining xadimliri xitay hökümiti élan qilghan xam chot heqqidiki türlük sanliq melumatlar we alaqidar qurulushlargha serp bolghan xirajetler asasida hésablap chiqqan.

Mezkur doklatni teyyarlap chiqqan gérmaniyelik mutexessis adryan zénz bu heqte toxtilip "Bu xirajetler 'kespiy téxnika mektepliri' ge emes, belki yüz minglighan Uyghurlar qamalghan 'terbiyelesh lagérliri' qurulushigha hemde buning normal aylinishigha serp bolghan" dep körsitidu. Shuningdek bu lagérlarda qandaq derslerning ötülüshidin qet'iynezer bularning bashqurulushi yaki xirajet serp qilinishining héchqandaq "Kespiy terbiyelesh" ke oxshimaydighanliqini tekitligen.

Chnn ning 6-noyabirdiki xewiride éytilishiche, bu xil zor éshish "Tutup turush orunlirini bashqurush" we "Edliye sistémisi"ni qamdash qatarliq "Ichki bixeterlik chiqimliri"gha serp bolghan. Yene kélip alaqidar sanliq melumatlar Uyghurlar diyaridiki heqiqiy "Kespiy terbiyelesh mektepliri"ning xirajiti 2017-yilining özide yette pirsent töwenlep ketkenlikini ishare qilidiken.

Xitay hökümet tarmaqliri roytérs agéntliqining bu heqtiki so'allirigha jawab bermigen. Xitay tashqi ishlar ministirliqining bayanatchisi xu'a chünying "Shinjangning bixeterlik xirajiti heqqide melumatliq emesmen" dep jawab bergen.

Toluq bet