Антоний билинкин американиң уйғурлар билән бир сәптә турудиғанлиқини тәкитлигән

Мухбиримиз ирадә
2022-05-26
Share

Америка ташқи ишлар министири антоний билинкин америка һөкүмитиниң хитай сияситини шәрһиләп сөзлигән муһим нутуқида американиң уйғурлар билән бир сәптә туридиғанлиқини алаһидә тәкитлигән.

У мундақ дегән: “америка бир милйондин артуқ адәм миллий вә диний кимлики сәвәбидин тутуп туруш лагерлириға ташланған шинҗаң районида йүз бериватқан ирқий қирғинчилиқ вә инсанийәткә қарши җинайи қилмишларға қарши дунядики һәрқайси дөләтләр вә хәлқләр билән бир сәптә туриду.”

Америка ташқи ишлар министири билинкин бүгүн йәни 26-май күни америкадики даңлиқ университетлардин җорҗи вашингтон унверсититида америка һөкүмитиниң хитай сиясити һәққидә нутуқ сөзлигән. У бу нутуқида хитайни “хәлқара тәртип дуч келиватқан әң еғир вә узун муддәтлик риқабәтчи” дәп сүпәтлигән.

У йәнә мундақ дегән: “хитай иқтисадий, дипломатик, һәрбий вә техника күчигә игә болған вә шундақла һәм хәлқара тәртипни қайта қуруш нийити болған бирдинбир дөләт. Бейҗиңниң тәсәввури бизни өткән 75 йил мабәйнидә дуняниң тәрәққиятини сақлап кәлгән универсал қиммәт қарашлиримиздин йирақлаштуруши мумкин.”

Антоний билинкин сөзидә йәнә “хитай хәлқ җумһурийити пәйда қиливатқан риқабәтниң көлими вә даириси америка дипломатийисини биз көрүп бақмиған дәриҗидә синватиду,” дегән.

Бирақ антоний билинкин американиң бу риқабәттә ишәнчкә толғанлиқини әскәрткән. У: “биз тинчлиқ вә бихәтәрликни қоғдайдиған, шәхсләр вә дөләтләрниң һоқуқини қоғдайдиған хәлқара қанун, келишим, принсип вә органларни қоғдаймиз вә күчәйтимиз,” дегән.

Билинкин байдин һөкүмитиниң истратегийәсини “мәбләғ селиш, маслаштуруш, риқабәтлишиш” тин ибарәт үч сөз билән йиғинчақлиған болуп, у американиң бундин кейин риқабәт күчи, йеңилиқ яритиш күчи вә демократийәгә мәбләғ салидиғанлиқини, иттипақдашлири вә шериклири билән һәмкарлиқни күчәйтидиғанлиқини билдүргән.

У буниңда америка президенти җов байдинниң асия сәпирини тилға елип, американиң “4 дөләт һәмкарлиқи”, һинди-тинч окян иқтисадий рамкиси (IPEF) ни вә шәрқий җәнубий асия иқтисад һәмкарлиқини күчәйтиватқанлиқини тилға елип өткән.

Билинкенниң мәзкур нутуқи байдин һөкүмитиниң хитай сияситиниң бундин кейинки нишанини бәлгиләйдиған муһим нутуқ болуп, у бу нутқида йәнә җәнубий деңизниң очуқлуқи, тәйвән мәсилиси, украина уруши, тор бихәтәрлики, 5G техникаси, кишилик һоқуқ вә келимат қатарлиқ саһәләр бойичә американиң мәйданини шәрһийләп өткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт