Antoniy bilinkin amérikaning Uyghurlar bilen bir septe turudighanliqini tekitligen

Muxbirimiz irade
2022-05-26
Share

Amérika tashqi ishlar ministiri antoniy bilinkin amérika hökümitining xitay siyasitini sherhilep sözligen muhim nutuqida amérikaning Uyghurlar bilen bir septe turidighanliqini alahide tekitligen.

U mundaq dégen: “Amérika bir milyondin artuq adem milliy we diniy kimliki sewebidin tutup turush lagérlirigha tashlan'ghan shinjang rayonida yüz bériwatqan irqiy qirghinchiliq we insaniyetke qarshi jinayi qilmishlargha qarshi dunyadiki herqaysi döletler we xelqler bilen bir septe turidu.”

Amérika tashqi ishlar ministiri bilinkin bügün yeni 26-may küni amérikadiki dangliq uniwérsitétlardin jorji washin'gton unwérsititida amérika hökümitining xitay siyasiti heqqide nutuq sözligen. U bu nutuqida xitayni “Xelq'ara tertip duch kéliwatqan eng éghir we uzun muddetlik riqabetchi” dep süpetligen.

U yene mundaq dégen: “Xitay iqtisadiy, diplomatik, herbiy we téxnika küchige ige bolghan we shundaqla hem xelq'ara tertipni qayta qurush niyiti bolghan birdinbir dölet. Béyjingning tesewwuri bizni ötken 75 yil mabeynide dunyaning tereqqiyatini saqlap kelgen uniwérsal qimmet qarashlirimizdin yiraqlashturushi mumkin.”

Antoniy bilinkin sözide yene “Xitay xelq jumhuriyiti peyda qiliwatqan riqabetning kölimi we da'irisi amérika diplomatiyisini biz körüp baqmighan derijide sinwatidu,” dégen.

Biraq antoniy bilinkin amérikaning bu riqabette ishenchke tolghanliqini eskertken. U: “Biz tinchliq we bixeterlikni qoghdaydighan, shexsler we döletlerning hoquqini qoghdaydighan xelq'ara qanun, kélishim, prinsip we organlarni qoghdaymiz we kücheytimiz,” dégen.

Bilinkin baydin hökümitining istratégiyesini “Meblegh sélish, maslashturush, riqabetlishish” tin ibaret üch söz bilen yighinchaqlighan bolup, u amérikaning bundin kéyin riqabet küchi, yéngiliq yaritish küchi we démokratiyege meblegh salidighanliqini, ittipaqdashliri we shérikliri bilen hemkarliqni kücheytidighanliqini bildürgen.

U buningda amérika prézidénti jow baydinning asiya sepirini tilgha élip, amérikaning “4 Dölet hemkarliqi”, hindi-tinch okyan iqtisadiy ramkisi (IPEF) ni we sherqiy jenubiy asiya iqtisad hemkarliqini kücheytiwatqanliqini tilgha élip ötken.

Bilinkénning mezkur nutuqi baydin hökümitining xitay siyasitining bundin kéyinki nishanini belgileydighan muhim nutuq bolup, u bu nutqida yene jenubiy déngizning ochuqluqi, teywen mesilisi, ukra'ina urushi, tor bixeterliki, 5G téxnikasi, kishilik hoquq we kélimat qatarliq saheler boyiche amérikaning meydanini sherhiylep ötken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet