Amérika kéngesh palata ezaliri antoniy bilinkinni b d t da Uyghurlar mesilisini otturigha qoyushqa chaqirdi

Washin'gtondin muxbirimiz irade teyyarlidi
2024.01.18

17-Yanwar küni amérika kéngesh palatasining marko rubiyo, tim keyn, jéf mérkléy we marsha bilakburn qatarliq ezaliri amérika tashqi ishlar ministiri antoniy bilinkén'gha xet ewetken. Uningda b d t da ötküzülidighan xitayning kishilik hoquq xatirisini “Uniwérsal qerellik tekshürüsh” yighinida bilinkinning xitay hökümitining Uyghurlargha yürgüzüwatqan irqiy qirghinchiliqi we insaniyetke qarshi jinayitini alahide tilgha élishi telep qilin'ghan.

Kéngesh palata ezalirining mezkur xétide Uyghurlar we Uyghur rayondiki bashqa musulman xelqlerge yürgüzülüwatqan irqiy qirghinchiliq hem insaniyetke qarshi jinayetning hélihem dawam qiliwatqanliqi eskertilgen. Uningda yene bir milyondin artuq Uyghurning hélihem lagérlarda tutup turuluwatqanliqi, mejburiy emgekke séliwatqanliqi, diniy étiqadining depsende qiliniwatqanliqi we rayondiki medeniyet iznalirining yoqitilish xewpige duch kéliwatqanliqi bayan qilin'ghan.

Ular xétide yene antoniy bilinkindin töt yilda bir qétim kélidighan bu qerellik bahalash pursitini ching tutup, xitay hökümitidin proféssor rahile dawut, gülshen abbas, ilham toxti, memet abdulla qatarliqlarni, shundaqla amérikadiki memetjan jüme, behram sintash we adalet sabitlarning a'ile-tawabi'atlirining mesilisini kötürüp chiqishni telep qilghan.

Bu yil 1-ayning 23- we 24-künliri birleshken döletler teshkilatida xitay heqqide “Uniwérsal qerellik tekshürüsh” élip bérilish aldida turmaqta. Xitay hökümiti bu ötkeldin ustiliq bilen ötiwélish üchün, özining Uyghur élidiki irqiy qirghinchiliqi we insaniyetke qarshi jinayetlirini yoqqa chiqirishqa, shundaqla keng kölemlik tetür teshwiqat arqiliq özini aqlashqa urun'ghan.

Halbuki, yuqiriqi kéngesh palata ezaliri tashqi ishlar ministiri antoniy bilinkin'ge yazghan xétide xitay hökümitining özi qol qoyghan xelq'ara ehdinamilerge qayta-qayta xilapliq qiliwatqanliqini, eger xitay hökümitining tesirining kéngiyishige yol qoyulghan teqdirde xeterlik aqiwet kélip chiqidighanliqini eskertken.

Kéngesh palata ezaliri xétide xitay hökümitining amérika puqraliri, tibetler we xongkongluqlargha tutuwatqan mu'amilisinimu tilgha élip ötken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.