Блинкен билән ваң йи телефонда сөзлишип, афғанистан вәзийитини музакирә қилған

Мухбиримиз әркин
2021-08-30
Share

Америка ташқи ишлар министири антони блинкен билән хитай ташқи министири ваң йи 29-авғуст телефонда сөзлишип, афғанистан вәзийитини шундақла америка-хитай мунасивәтлирини музакирә қилған.

Бу, блинкен билән ваң йиниң йеқинқи 2 һәптә ичидә 2-қетим сөзлишиши болуп, улар америка-хитай мунасивити уйғурларниң “ирқий қирғинчилиққа” учриши, хоңкоң вәзийити, корона вируси, тәйвән, җәнубий деңиз, мәҗбурий әмгәк қатарлиқ мәсилиләр түпәйлидин қаттиқ йириклишип кәткән бир вақитта сөзләшкән.

Америка ташқи ишлар министирлиқи бу һәқтики баянатида, бу сөһбәтниң тәпсилати тоғрисида көп тохталмиған болуп, баянатчи нед прайс блинкенниң ваң йи билән “хәлқара җәмийәтниң талибанларни афғанлар вә чәтәлликләрниң бихәтәр йөткилиши һәм саяһәт әркинлики тоғрисида бәргән ашкара вәдиси мәсилисидә җавабкарлиққа тартишниң муһимлиқини сөзләшкәнлики” ни билдүргән.

Лекин, ройтерс агентлиқиниң хәвәр қилишичә, ваң йи барлиқ тәрәпләрниң талибан билән учришиши вә уларни “иҗабий тәрәпкә йетәклиши” керәкликини ейтқан. У йәнә “американиң террорлуққа қарши қош өлчәм қоллиниш яки таллап қарши туруш орниға конкрет һәрикәт қоллинип, афғанистанниң террорлуққа қарши күрәш қилиши вә зораванлиқни тохтитишиға ярдәм қилиш керәклики” ни илгири сүргән.

Ваң йи йәнә “хитай америка тәрәп билән қандақ алақә қилишни униң хитайға тутқан муамилисигә асасән ойлишиду”, дегән. Ваң йи өткән қетим американиң “шәрқий түркистан ислам һәрикити” ни қайта террорлуқ тәшкилатлар тизимликигә киргүзүшини тәләп қилғаниди.

Лекин бәзи көзәткүчиләрниң ейтишичә, хитай афғанистан вәзийитидики өзгиришни дәстәк қилип, өзиниң 20 йилдин бери давамлаштуруп кәлгән “шәрқий түркистан террорлуқ тәһдити” нәзәрийәсини қайта базарға салмақта вә бу арқилиқ диққәтни бурап, өзиниң уйғурларға қарита елип барған “ирқий қирғинчилиқ” қилмишини йепишқа урунмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт