Antoni bilinkénning xitay sepiri harpisida telepler otturigha chiqishqa bashlidi

Amérika tashqi ishlar ministiri antoni bilinkén ependi xitay sepirige atlinish harpisida turuwatqanda bir qisim amérika puqraliri özlirining bu heqtiki teleplirini we munasiwetlik arzulirini axbarat wasitiliri arqiliq dunyagha bildürgen.

Roytérs agéntliqining 18-yanwardiki xewiride éytilishiche, féwral éyining béshida béyjinggha bérishni pilan qiliwatqan antoni bilinkénning xitay hökümiti bilen némilerni déyishidighanliqi hazirche namelum bolsimu, amérika-xitay munasiwitidiki yiriklik mesilisining buningdiki merkiziy téma bolushi texmin qiliniwatqanliqi melum. Shuning bilen birge beziler buningda démokratiye we kishilik hoquq mesililirining muzakire qilinishi heqqide ümidwar ikenlikini bildürgen.

Roytérs agéntliqi bir qisim amérika puqralirining hazirghiche xitay türmiliride qamilip turuwatqan perzentliri yaki bashqa uruq-tughqanlirining isimlikini toplap chiqqan bolup, bu kishiler antoni bilinkén'ge “Béyjinggha barghanda mushu isimlarni sürüshte qilip béqish” telipini yollighan. Bu xildiki kishilerdin kasérina swidan (Katherine Swidan) on yildin buyan bigunah halda xitay türmiside qamaqliq turuwatqan oghli mark (Mark) ning ehwalini sürüshte qilip béqishni, shuningdek xitay hökümitige markni qoyup bérish heqqide bésim qilishni sorighan. U, bu heqte söz qilip: “Méning bilinkén ependige deydighinim shuki, ashu kishilerning ismini tilgha éling. Ular amérika puqrasi. Ular bigunah tutqun qilin'ghan” dégen.

Bu xildiki bir türküm amérika puqraliri xitay teripidin zeher sétish, jasusluq qilish dégendek bir qatar jinayetler bilen eyibli'ip türmige tashlan'ghan bolup, ularning ehwali köp qisim amérika puqralirigha namelum bolup kelgen.