Amérika kéngesh palata ezaliri blinkéndin xitaygha soda we kishilik hoquqta bésim ishlitishni telep qilghan

Amérika dölet mejlisining jumhuriyetchiler partiyesidin bolghan 10 din artuq kéngesh palata ezasi tashqiy ishlar ministiri blinkén bilen maliye ministiri jénit yélin'gha xet yézip, ularning béyjing ziyaritide xitaygha kishilik hoquq, soda we xitayning hindi-tinch okyandiki tajawuzchiliq xahishi qatarliq mesililerde bésim ishlitishini telep qilghan. 14 Neper kéngesh palata ezasi xétide, ularning xitay kompartiyesining kishilik hoquq, soda, izchil küchiyiwatqan rayon we dunyadiki tajawuzchiliq xahishini jawabkarliqqa tartishi kéreklikini éytqan. Bu xet blinkén 3-féwral özining xitay ziyaritini kéchiktürgenlikini élan qilishtin 3 kün burun yézilghan bolup, uninggha marku rubiyo, chak grasléy, érik shmit, linzéy graham, rik skot qatarliq 14 kishi imza qoyghan.

Kéngesh palata ezaliri xétide, xitay kompartiyesining kishilik hoquqni “Eng éghir depsende qilghuchi” ikenliki, tramp we baydén hökümetlirining her ikkilisi xitayning shinjangdiki Uyghur we bashqa köp sanliqi musulman az sanliq milletlerge qarartqan herkitini irqiy qirghinchiliq we insaniyetke qarshi jinayet, dep étirap qilghanliqini eskertken. Ular xétide mundaq dégen: “Siz choqum amérikaning görüge élishni söhbet kozéri qilip ishlitidighan bir hakimiyet bilen hemkarlashmaydighanliqini éniq ipadilishingiz kérek.”

Kéngesh palata ezaliri yene xitayning uzundin béri dawamliship kéliwatqan adaletsiz soda pa'aliyiti we amérika iqtisadigha ziyan yetküzüp kelgen sana'et jasusliqigha qarshi turushini telep qilghan. Kéngesh palata ezaliri blinkén bilen yélin'gha bu xetni ewetip 3 kündin kéyin, blinkén xitay ziyaritini kéchiktürgenlikini élan qilghan.

Bklinkénning ziyaritining kéchiktürülüshige xitayning bir jasusluq hawa sharining amérika hawa boshliqida peyda bolushi seweb bolghan iken.