Bilinkén uzundin béri kéchiktürülüp kelgen xitay ziyaritini kéler hepte élip bérishni pilan qildi

Amérika tashqi ishlar ministiri bilinkénning bu yil 2-aydin béri kéchiktürülüp kelgen xitay ziyaritining kéler hepte élip bérilidighanliqi bildürüldi. “Politiko” gézitining 8-iyun küni ashkarilishiche, bilinkénning pilanidin xewerdar zatlardin ikki kishi bilikénning xitay ziyaritining kéler hepte élip bérilidighanliqini éytqan. Bilinkénning xitay ziyariti ötken qétim bir xitay jasusluq sharining amérika hawa boshluqigha kirishi sewebidin kéchiktürülgen. Bu qétim uning ziyariti xitayning kuba bilen kubada bir éléktronluq jasusluq bazisi qurushni pütüshkenlikige da'ir xewerler amérikada qattiq ghulghula qozghap, xitaygha qarita téximu qattiq bixeterlik tedbirlirini élish telep qiliniwatqan bir waqitqa toghra keldi.

Aqsaray bilen amérika dölet mudapi'e ministirliqi xitayning kubagha éléktronluq jasusluq bazisi qurudighanliqigha da'ir xewerlerning toghra emeslikini qeyt qilghan bolsimu, lékin “Wol schérét zhurnili” géziti bilen s n n béyjingning kubada éléktronluq jasusluq bazisi qurush üchün hawanagha “Bir qanche milyard” dollar neq pul töleshke wede qilghanliqini bildürgen.

“Politiko” gézitining qeyt qilishiche, amérika tashqi ishlar ministirliqi dawamliq bu ziyaretning tepsilatliri üstide ishlewatqan bolup, eger bu ziyaret emelge ashsa bu sabiq amérika tashqi ‍ishlar ministiri pompé'oning 2018-yili élip barghan xitay ziyaritidin buyanqi amérika emeldarining eng yuqiri derijilik xitay ziyariti bolidiken. Bilinkén bu yil 2-ayda xitay ziyaritini kéchiktürüshtin bir qanche kün burun Uyghurlarni qobul qilghan. Emma bu körüshüshning mezmuni ashkarilanmighanidi.

“Politiko” gézitining bildürüshiche, weqedin xewerdar zatlar, nöwette ottura sherqte ziyarette boluwatqan bilinkénning ottura sherq ziyaritining arqisidin xitaygha baridighanliqini éytqan. Emma amérika tashqi ishlar ministirliqi bu heptining bashliri bilinkénning “Élan qilidighan ziyaret pilani yoqluqi” ni bildürgenidi.