Билинкен хитай зияритидин илгири уйғур ирқий қирғинчилиқниң давам қиливатқанлиқини ейтти

Вашингтондин мухбиримиз уйғар тәйярлиди
2024.04.23

Америка ташқи ишлар министири антоний билинкен хитайни зиярәт қилиштин 2 күн бурун ташқи ишлар министирлиқиниң “һәрқайси дөләтләрниң 2023 йиллиқ кишилик һоқуқ доклати” ни елан қилип, хитайниң уйғур диярида терроризм, бөлгүнчилик вә диний радикаллиқни тизгинләшни баһанә қилип уйғур ирқий қирғинчилиқини давамлаштуруватқанлиқини ейтқан.

Ройтерис агентлиқи (Reuters) ниң 2024-йили 4-айниң 23-күнидики хәвиригә асасланғанда, америка ташқи ишлар ишлири министир антоний билинкен бу һәптә хитай зияритини башлаштин бурун дүшәнбә күни елан қилинған доклатта хитайниң уйғур диярида уйғур вә башқа мусулман аз санлиқларға қаритилған ирқий қирғинчилиқи вә инсанийәткә қарши җинайитини давамлаштуруватқанлиқини билдүргән.

Билинкен мундақ дегән: “хитай хәлқ җумһурийитидә елип бериливатқан еғир кишилик һоқуқ дәпсәндичилики испатлири билән оттуриға қоюлди. Мәсилән, хитай хәлқ җумһурийити шинҗаңда мусулман уйғурларни асас қилған вә башқа етник вә диний азсанлиқ милләт әзалириға қаритилған ирқий қирғинчилиқ, инсанийәткә қарши туруш җинайити, мәҗбурий әмгәк вә башқа кишилик һоқуқ дәпсәндичиликлирини елип бармақта”.

Дүшәнбә күни елан қилған доклатта йәнә уйғур диярида бир милйондин артуқ кишиниң лагер вә түрмиләрдә тутуп турулуши вә уйғур дияридики қайта тәрбийәләш лагерлириниң ишлитилиши қатарлиқ тәпсилатлар вә хитайниң кәң уйғурларға қилинған башқа хорлашлири тәпсилий баян қилинған.

Билинкен 2021-йили вәзипигә олтурғанда, униңдин илгирики америка һөкүмитиниң уйғур ирқий қирғинчилиқ тоғрисидики қарарини қоллиған вә у хитай әмәлдарлири билән көрүшкәндә бу мәсилини оттуриға қойғаниди.

Америка ташқи ишлар министирлиқиниң баянатиға асасланғанда, америка ташқи ишлар министири антоний билинкен 24-апрелдин 26-апрелғичә хитайни зиярәт қилидикән. У шаңхәй вә бейҗиңда хитайниң юқири дәриҗилик әмәлдарлири билән көрүшүп, оттура шәрқтики киризис, русийәниң украинаға қарши уруши, тәйвән мәсилиси вә җәнубий деңиз қатарлиқ бир қатар район характерлик вә дуняви мәсилиләрни музакирә қилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.